Səməd Qurbanov: Neftçi Makedoniyaya yalnız qələbə üçün gəlib

"Neftçi"nin Müşahidə Şurasının üzvü Səməd Qurbanov Avropa Liqasının ikinci təsnifat mərhələsi çərçivəsində Makedoniya "Şkendiya"sı ilə səfər oyunu öncəsi azerisport.az saytının suallarını cavablandırıb:

- Səfərə hansı ümidlərlə gəlmisiniz?
- Müsbət ümidlərlə. Komanda yaxşı futbol sərgiləməlidir. Hamımız futbolçulardan yalnız uğurlu oyun və nəticə gözləyirik. Buraya yalnız qələbə üçün gəlmişik.

- Yəqin ki, komandanın sərgilədiyi oyun hələ sizi qane etmir?
- Düzünü demək lazımdırsa, hələ sərgilənən oyun sevindirmir. Amma komandanın potensialı var. Uşaqlar daha da artırmalıdırlar. Ayrı-ayrılıqda heyətin hər bir üzvü yaxşıdır. Amma kollektiv oyun hələ istənilən səviyyədə deyil.

- Heyəti komplektləşmiş saymaq olar?
- Hazırda daha bir transfer gözləyirik. Avrokuboklarda da mümkün olmasa, onun xidmətindən çempionatda yararlana biləcəyik. Klubun 80 illik yubileyi gəlir. Ona qədər bizim rəqabətədavamlı komandamız olmalıdır.

- "Neftçi" Avroliqada ümidləri doğrultmasa, baş məşqçi Vəli Qasımovla bağlı hansısa fərqli qərar verməyiniz mümkündür?
- Biz onu bu posta bir neçə avrokubok oyununa görə təyin etməmişik. İstənilən halda Qasımov postunda qalacaq. Amma Qasımov da özünü göstərməlidir. Çünki o, "Neftçi" kimi bir komandanın baş məşqçisidir. Sıradan bir klubu çalışdırmır. Hazırda hər birimiz ona dəstək olmağa çalışırıq.

- Futbolçuların Malta "Baltsan"ını keçməyə görə mükafat almadığı barədə xəbərlər doğrudur?
- Belə məsələlərlə mən məşğul olmuram. Baxmayaraq ki, bunu məhz Müşahidə Şurası müəyyənləşdirir. Futbolçular mükafat almalıdırlarsa, onu gec və ya tez alacaqlar.

- Bu oyunda rəhbərlikdən kimlər olacaq?
- Çingiz Abdullayev Makedoniyaya gələ bilmədi. Müşahidə Şurasından yalnız mən oyunda olacağam.