Şəhriyar Əliyev: Admira bizdən nə güclü idi, nə də zəif

"Kəpəz"in müdafiəçisi Şəhriyar Əliyev Avropa Liqasının ikinci təsnifat mərhələsi çərçivəsində Avstriyanın "Admira" klubuna qarşı keçirdikləri cavab oyunundan (0:2, ilk oyun – 0:1) sonra azerisport.az saytının da suallarını cavablandırıb:

- Matçla bağlı nə deyərdiniz?
- Diqqətli oynamağa çalışdıq. Amma ani diqqətsizlik və səhv iki qol buraxmağımıza səbəb oldu. Halbuki, mərhələ adlamağı çox istəyirdik. Təəssüf ki, alınmadı. Əlbəttə, "Kəpəz" üçün hətta bir mərhələ keçmək də uğurdur. Amma yenə də mümkün qədər irəli getmək istəyirdik. Çox təəssüf ki, alınmadı.

- Razısınız ki, "Admira"nı keçə bilərdiniz?
- Əlbəttə. Oyundan sonra danışmaq asandır. Amma rəqibimiz bizdən nə zəif idi, nə də güclü. Qol vəziyyətlərimiz də oldu, vura bilmədik.

- Oyun sizin istədiyiniz kimi getmədi?
- Bəli. Kifayət qədər diqqətli oynaya bilmədik. İlk qolu buraxmağımız isə artıq bütün planlarımızı korladı.

- Səfərdə daha yaxşı oynamışdınız, ya bu gün?
- Həm səfərdə yaxşı oynadıq, həm də burada. Bakıda qol vəziyyətlərimiz daha çox oldu. Sadəcə, səfərdə daha ehtiyatlı oynamışdıq.

- Rəqib qollardan birini sizin uğursuz ötürmənizdən sonra vurdu. Oyundan sonra Şahin Diniyev buna görə sizə bir söz dedi?
- Xeyr, heç nə demədi. Desə də, hər şeyi qəbul edirəm. O, nə dediyini yaxşı bilir.