Akrapoviç: Bizi Neftçi ilə böyük oyun gözləyir
Avropa Liqasının ikinci təsnifat mərhələsinin cavab qarşılaşması çərçivəsində "Neftçi"ni qəbul edəcək Makedoniya "Şkendiya"sının baş məşqçisi Bruno Akrapoviç mətbuat konfransı keçirib. Azerisport.az xəbər verir ki, mütəxəssis oyunla bağlı öncə bunları söyləyib:
- İlk oyunda qeydə alınan heç-heçə bizi qane etdi. Növbəti mərhələyə adlamaq şansımız var. Bu şansdan istifadə etmək lazımdır. Bakıda yaxşı oynadıq. Bunu nəzərə alsaq, mərhələ keçə bilərik. Makedoniya futbolu üçün bu, böyük şansdır.
- "Neftçi"ni keçəcəyinizə əminsiniz?
- Bunu öncədən demək olmaz. "Neftçi"nin böyük tarixə malik klub olduğunu bilirik. Amma biz öz futbolumuzu oynayacağıq. Bundan nə çıxacaq, zaman göstərəcək.
- Rəqibin mümkün sürprizinə hazırsınız?
- Hər şeyə hazırıq. Amma biz heç bir sürpriz istəmirik. İstənilən halda "A" planımız da var, "B" planımızda. Hətta "D" planına - penaltilərə də hazırıq.
- Heyətdə dəyişiklik olacaq?
- Xeyr. İlk oyunda meydanda dominantlıq edirdiksə, heyəti dəyişməyin mənası yoxdur.
- İlk oyunda "Şkendiya" hücumlarını mərkəzdən qururdu. Sabahkı oyunda fərqli taktikadan istifadə etməyi düşünürsünüz?
- Bu, sizin fikrinizdi. Qismən razılaşıram. Doğrudan da mərkəzdən daha çox hücumlar qurduq. Ancaq cinahlarda da təzyiq göstərirdik. Qol da vura bilərdik.
- Növbəti rəqib barədə düşünmürsünüz?
- Xeyr. Çünki belədə, sabahkı oyunda büdrəyə bilərik. Doğrudu, sonra az vaxtımız qalacaq. Amma mərhələ adlayacağımız təqdirdə maksimum konsentrasiya olub, 3-cü turdakı rəqibi də təhlil edəcəyik. İndi isə ancaq "Neftçi"ni düşünürük. Bizi bu komanda ilə böyük oyun gözləyir.
