Təbriz Həsənov: Səbailin öz baş məşqçisi var, mənə bu post təklif olunmayıb
Yeni yaradılan "Səbail" klubunun Müşahidə Şurasının üzvü seçilən Təbriz Həsənov komandanın 1-ci diviziondakı hədəflərindən danışıb. Azerisport.az saytına açıqlamasında o, bunları söyləyib:
"Mənə bu klubdan təklif gəldi, məmnuniyyətlə qəbul etdim. Yeni yaradılan bu kluba kömək etmək istədim. Komandanın öz baş məşqçisi var - Elman Rüstəmov. Yəni mənə baş məşqçi vəzifəsi təklif olunmayıb. Komandada yerli futbolçular oynayacaqlar. Əsasən gənclərdir, amma təcrübəli futbolçular da olacaq. Gələcəklə bağlı böyük planlar var. Premyer Liqaya çıxmaq? İştah yemək zamanı yaranır. Bu həftə seleksiya işləri başa çatmalıdır. Niyə də ilk beşlik üçün mübarizə aparmamalıyıq?"
Qeyd edək ki, Həsənov eyni zamanda Azərbaycanın U-18 yığmasının baş məşqçisi olacaq: "Millidəki yetirmələrimdən də kimlərsə bu komandada oynaya bilər. Amma yekun qərarı klub rəhbərliyi verir, həm də futbolçuların özü bunu istəməlidir".
