Rikardinyo: Qəbələ MTK-ya şans verməsə, qələbə qazana bilməz
"Qəbələ"nin müdafiəçisi Rikardinyonun azerisport.az saytına müsahibəsi
- Avroliqanın ikinci təsnifat mərhələsində Macarıstan MTK-sı ilə cavab oyununa hazırsınız?
- Əlbəttə, tam hazırıq. Bu oyun həm bizim, həm də azarkeşlərimiz üçün çox vacibdir.
- Səfərdə 2:1 hesabıyla qalib gəldiyiniz MTK Bakıda sürpriz edə bilər?
- Bəli. Birinci matçda da onlar qələbə qazanmaq gücündə olduqlarını göstərdilər. MTK çox yaxşı futbol sərgiləyir. Amma biz onlara şans verməsək, qələbə qazana bilməzlər. Cavab görüşündə də qələbəyə oynayacağıq.
- Növbəti mərhələyə vəsiqə qazansanız, Fransanın "Lill" klubu ilə qarşılaşacaqsınız...
- Bizim üçün hansı komanda ilə oynamağın fərqi yoxdur. İstənilən halda hədəfimiz qrup mərhələsinə vəsiqə qazanmaqdır. Mən yaxşı oyunları, maraqlı və gərgin mübarizələri xoşlayıram. Biz də özümüzü məhz belə rəqiblərlə oyunlarda göstərə bilərik.
- Yəqin ki, MTK-ya Bakıda da qalib gəlməklə fransızlara öz gücünüzü göstərməyə çalışacaqsınız...
- Bizim istəyimiz hər oyundan qələbə ilə ayrılmaqdır. MTK ilə oyun da istisna deyil.
- "Lill"i də keçə biləcəksiniz?
- Öncədən nəsə demək istəmirəm. Çünki biz hələ MTK səddini keçməmişik. Yalnız mərhələ adlayacağımız halda "Lill" barədə düşünmək olar.
- "Qəbələ"yə yeni transferlər lazımdır?
- Komandaya yaxşı futbolçuların gəlməsi həmişə sevindirici olur. Onlar komandanı gücləndirirlər. Hazırda güclü komandamız var. Hazırlıq səviyyəsi də yüksəkdir. Klub rəhbərliyi yenə oyunçu alacağını açıqlayıb. Amma hətta yeni oyunçusu alınmasa da, bu heyətlə heç bir problemimiz olmayacaq.
- İndiki "Qəbələ"ni ötən mövsümdəkindən güclü sayanlar var. Siz bununla razısınız?
- Müqayisə etmək çətindir. Bunlar iki fərqli komandadır. Fikrimcə, biz daha yüksək nəticələr əldə edə bilərik.
