Vitali Vernidub: Bakıda da qələbə qazanacağımıza inanırıq
"Qəbələ"nin müdafiəçisi Vitali Vernidub Avropa Liqasının ikinci təsnifat mərhələsi çərçivəsində Macarıstan MTK-sı üərində qazandıqları səfər qələbəsindən (2:1) sonra azerisport.az saytının suallarını cavablandırıb.
- MTK ilə ilk oyununuz barədə fikirləriniz?
- Ağır oyun oldu. Müəyyən qədər bəxtimiz də gətirdi ki, rəqib penaltini vura bilmədi. Bundan sonra isə biz təşəbbüsü ələ alıb iki qol vurduq. İki gün Macarısta klubunun oyunlarına baxmışdıq, analizlər aparmışdıq.
- Qələbə nə dərəcədə çətin başa gəldi?
- Biz ona görə qələbə qazandıq ki, məşqçilərimizin tapşırıqları dəqiq yerinə yetirdik. Əlbəttə, səhvlərimiz də oldu. Bunsuz keçinmək mümkünsüzdür. Amma buraxılan səhvlər üzərində çalışacağıq ki, sayını minimuma endirək. Növbəti oyunda daha yaxşı oynamağa çalışacağıq.
- Sizcə, macarlar penaltini dəqiq yerinə yetirsəydilər, nəticə fərqli ola bilərdi?
- Bəli, bu, matçın nəticəsinə təsirsiz ötüşməyəcəkdi. Amma bu barədə danışmağın mənası yoxdur. Əsas odur ki, qələbə qazandıq.
- "Qəbələ"ni artıq növbəti mərhələyə vəsiqə qazanması münasibətilə təbrik etmək olar?
- Xeyr. MTK çox güclü komandadır və Bakıya qələbə üçün gələcək. Konsentrasiyanı saxlamağa çalışmalıyıq. Maksimum diqqətli oynamalı, hücumlarımızı məhsuldar tamamlamalıyıq. Yalnız belə olan halda mərhələ adlaya bilərik. Hələ heç nə bitməyib. Qarşıda 90 dəqiqə var.
- MTK-ya yenə qalib gələ biləcəksiniz?
- Qələbəyə inanırıq. Ancaq buna çalışacağıq. Azarkeşlərimiz qarşısında oynayacağıq. Onların inamını doğrultmalıyıq.
- Mütəxəssislərin çoxu "Qəbələ"ni növbəti mərhələdə görür, "Kəpəz"lə "Neftçi"nin isə üçüncü mərhələyə çıxacacağına inanmır. Siz bu barədə nə düşünürsünüz?
- "Neftçi" və "Kəpəz" də ilk mərhələdə uğur qazanmağı bacardığını göstərib. Onlara uğurlar arzulayıram və inanıram ki, mərhələ keçəcəklər. Hər ikisində komandanı arxasınca apara biləcək futbolçular var.
- MTK səddini keçsəniz, Fransanın "Lill" komandası ilə qarşılaşacaqsınız. Bəxtinizin gətirmədiyini demək olar?
- İndidən Fransa klubu barədə danışmaq istəmirəm. Çünki hələ mərhələni keçməmişik. Fransızları müzakirə etməyə başlasaq, bu, bizə baha başa gələ bilər. İndi ancaq MTK haqda düşünürük. Mərhələni keçək, ondan sonra "Lill" barədə danışarıq.
