Krşevan Santini: Fanatların buna haqqı var

"Neftçi"nin qapıçısı Krşevan Santini Avropa Liqasının ikinci təsnifat mərhələsi çərçivəsində Makedoniya "Şkendiya"sına qarşı keçirdikləri ilk oyunu şərh edib. Azerisport.az xəbər verir ki, legioner futbolçu qolsuz bitən matçdan sonra bunları söyləyib:

"Hər iki komanda qol vura, qələbə qazana bilərdi. Amma fikrimcə, 0:0 da bizim üçün pis nəticə deyil. Skopyedə uğurlu nəticəyə ümid edə bilərik. Razıyam ki, Malta "Baltsan"ı ilə ev oyununa nisbətən bu gün daha yaxşı oynadıq, həyəcanlı deyildik. Bizi dəstəkləməyə gələn azarkeşlərə də minnətdarlığımı bildirirəm. Mümkündür ki, onların hamısı bizdən razı qalmasın. Azarkeşlər həmişə qələbə istəyirlər, bu, onların haqqıdır. Biz də onları sevindirməyə çalışırdıq. Amma bu dəfə alınmadı. Futbolda belə hallar olur, hərdən alınır, hərdən yox. Amma özünüz də görürsünüz ki, komandamız yeni formalaşıb, bir-birimizə yenicə alışırıq. Hər gün daha da yaxşı olmağa çalışırıq".