Arif Əsədov: Neftçi üçün belə oyunla heç-heçə yaxşı nəticədir

"Neftçi"nin sabiq baş məşqçisi Arif Əsədovun azerisport.az saytına müsahibəsi

- "Neftçi"nin Avroliqanın ikinci təsnifat mərhələsi çərçivəsində Makedoniya "Şkendiya"sı ilə ev oyunundakı qolsuz heç-heçəsini necə şərh edə bilərsiniz?
- Makedoniya "Şkendiya"sı gözlədiyimdən daha güclü rəqib imiş. Qonaqlar xüsusilə ilk yarıda böyük üstünlüyə malik idilər. İkinci hissədə isə "Neftçi" əks-hücumlarda təhlükəli olmağa başladı. Belə oyunla qolsuz heç-heçə yaxşı nəticədir. Bütövlükdə, bakılıların mərhələ adlamaq üçün şansları pis deyil. Amma bu şansdan yararlanmaq lazımdır.

- Səfərdə Macarıstan MTK-sına qalib gələn "Qəbələ"nin cütün taleyini həll etdiyini demək olar?
- Komandamız yaxşı futbol sərgilədi. Rəqibin oyunun əvvəlində penaltini qaçırması "Qəbələ"yə ikinci nəfəs verdi. Onlar hücumda daha kreativ oynamağa başladılar. Bu mövsüm "Qəbələ" çox yaxşı təsir bağışlayır. Səfərdə iki qol və qələbə hələ mərhələ adlamağa tam zəmanət vermir. Amma işin 70 faizi artıq görülüb. Ev oyununda da asan olmayacaq.

- "Kəpəz" Avstriya "Admira"sına səfərdə minimal hesabla uduzdu...
- Onlara ən güclü rəqib qismət olub. Gənc və sürətli komandadır. Buna baxmayaraq, "Kəpəz" müdafiədə çox inamlı oynadı. Bu məğlubiyyətə baxmayaraq, komandamız yenə mərhələ keçmək şansını saxlayır. Amma bunun üçün futbolçularımız gərək ev oyununda xarakter nümayiş etdirsinlər.

- Sizə elə gəlmir ki, "Qarabağ" Lüksemburq "Düdelanj"ına qarşı daha yaxşı oynaya bilərdi?
- Biz artıq mövsümün ilk oyunlarının "Qarabağ" üçün çox çətin keçdiyini görməyə alışmışıq. Rəqib də komandamızı yaxşı analiz etmişdi. Müdafiədə boşluq buraxmırdılar. Fikrimcə, cavab oyunu ağdamlılar üçün daha asan keçəcək. Amma daha vacib olan bu rəqibi mübarizədən kənarlaşdırmaqdır.

- Klublarımızdan hansı növbəti mərhələyə adlaya biləcək?
- "Qarabağ"la "Qəbələ" demək olar ki, vəzifəsinin öhdəsindən gəlib. Amma "Neftçi" ilə "Kəpəz"in taleyi sual altındadır.