Bruno Akrapoviç: Bizi ya heç-heçə, ya da qələbə qane edəcək

Avropa Liqasının ikinci təsnifat mərhələsi çərçivəsində sabah baş tutacaq "Neftçi" - "Şkendiya" matçı öncəsi Makedoniya təmsilçisinin baş məşqçisi Bruno Akrapoviç mətbuat konfransı keçirib. Azerisport.az xəbər verir ki, qonaqların çalışdırıcısı öncə qarşılaşma haqda fikirlərini bildirib:

- Çox gözəl şəhəriniz var. Xüsusi ilə də insanlarınız. Rəqibi yaxşı analiz etmişik. "Neftçi" güclü komandadı. İntizamlı oyun sərgiləyib, sərfəli nəticə qazanmağı düşünürük. Hər iki komanda oyuna ciddi hazırlaşıb. Bunun da nəticəsini meydanda görəcəyik. "Neftçi"nin "Baltsan"la hər iki oyunu izləmişəm. Rəhman Hacıyev, Ruslan Qurbanov, Vançe Şikov və Araz Abdullayevin oyunlarını xüsusi ilə vurğulamaq istəyirəm. Bir də qapıçını. Onu çoxdan tanıyıram.

- Sabahkı oyunda sizi hansı nəticə qane edəcək? Bilirsiz ki, "Neftçi" son vaxtlar öz evində qələbə üzünə həsrət qalıb?
- Qələbə və ya heç-heçə bizi qane edəcək. Statistika ilə bağlı da məlumatımız var. Polşa komandası ilə oyun da bizim üçün asan keçmədi. Buna baxmayaraq, mərhələ adlayan tərəf biz olduq.

- Makedoniya klublarının Bakıda qalib gəlmədiklərini də bilməlisiz...
- Bu barədə də məlumatımız var. Çalışacağıq ki, statistik göstəricilərdə dəyişikliyə nail olaq.

- "Neftçi" ilə oyunlardakı uğursuzluqlar "Şkendiya"dakı karyeranıza son qoya bilər?
- Məşqçilikdə çox cavanam.  Çalışdığım klublarda elə insanlar olub ki, mənim üslubumla uyğun gəlməyib.