Vəli Qasımov: Şkendiyanın hücum xətti çox güclüdür
"Neftçi"nin baş məşqçisi Vəli Qasımov Avropa Liqasının birinci təsnifat mərhələsi çərçivəsində sabah qarşılaşacaqları Maekedoniya "Şkendiya"sı ilə oyun öncəsi fikirlərini bölüşüb. Azerisport.az xəbər verir ki, o, bu gün baş tutan mətbuat konfransında öncə bunları söyləyib:
- Bizi çətin oyun gözləyir. Rəqibin oyununa baxmışıq. Çox yaxşı komandadır. Amma biz də evdə qələbə qazanmaq üçün darıxmışıq. Bu görüşdə qalib gəlmək istəyirik.
- Rəqibin müdafiəsindəki problemləri analiz edə bilmisiniz?
- Malta klubu da zəif rəqib idi, amma bizə qalib gəldi. Onların da hücum xətti çox güclüdür. Məncə, müdafiələrində də ciddi problem yoxdur.
- "Baltsan"la oyun sizin üçün dərs oldu? Bu dəfə də cütün taleyini ilk oyunda həll edə biləcəksiniz?
- Rəqibin heyətində altı legioner var. Yaxşı futbolçular transferlər ediblər. "Şkendiya" güclü rəqibdir. Bu komandaya 5-6 qol vurmaq lazımdrı ki, mərhələ keçməkdən danışa biləsən.
- Komandanızda bu bir həftədə nə dəyişib?
- Uduzmağı heç kim xoşlamır. Oyunumuzu analiz etmişik. Son oyunun birinci hissəsində problem yox idi. Sadəcə, ikinci hissədə özünəinamı itirdik. Bütövlükdə, hər iki oyunda yaxşı çıxış etdik.
- Niyə yeni transferlər etmirsiniz?
- Oyunçularla danışıqlar davam edir. Hələ bu məsələni həll etməmişik. Ya futbolçu ilə tam razılığa gələ bilməmişik, ya da klublarla. Əldən buraxdığımız oyunçular da oldu. Biz də yeni futbolçularla güclənmək istəyirik.
- Start heyətini müəyyənləşdirmisiniz?
- Bəli. Amma bunu demək istəmirəm. Elşən Abdullayevin zədəsi var. Onun bu matçda iştirakı sual altındadır.
- Oyununuzu rəqibə görə quracaqsınız, ya öz futbolunuzu sərgiləyəcəksiniz?
- Biz hər şeyi nəzərə almışıq. "Neftçi" oyuna hazırdır. Sabahkı matç öncəsi sakitəm. Bilirəm ki, uşaqlar çıxıb, oynayacaqlar.
- "Neftçi" bu oyunda uduzsa, ondan sonra baş verənlərə hazırsınız?
- Uda da bilərik, uduza da. Biz pozitiv yanaşırıq.
