Dino Topmöller: Qarabağ ilə Düdelanj arasında fərq çox böyükdür

UEFA Çempionlar Liqasının ikinci təsnifat mərhələsinin ilk oyunu çərçivəsində keçirilən “Qarabağ” – “Düdelanj” görüşündən sonra Lüksemburq çempionunun baş məşqçisi Dino Topmöllerin mətbuat konfransı keçirilib. Azerisport.az xəbər verir ki, alman mütəxəssis “Qarabağ”a qarşı oyunu belə şərh edib:

- Çətin oyun oldu. Gözlədiyimiz kimi, ilk 15 dəqiqədə "Qarabağ" çox yaxşı təsir bağışladı. İkinci hissədə isə biz yaxşı oynadıq. Onlara qol epizodu yaratmağa imkan vermədik. Peşəkarların həvəskarlara qarşı oynadığını nəzərə alsaq, pis təsir bağışlamadıq.

- Oyundan öncə Lüksemburq çempionu adına layiq oyun sərgiləyəcəyinizi söyləmişdiniz. Bacardığınız elə budur?
- Fikrimcə, pul hər şeyi həll etmir, amma yaxşı futbolçular almaq üçün yaxşı da pulun olmalıdır. Bizim belə imkanımız yoxdur. Komandalar arasında fərq böyükdür. Lakin hər şeyə rəğmən, biz pis oynamadıq.

- 0:2-dən sonra mərhələ adlamaq şansınız qalıb?
- Rəqibə müqavimət göstərməyə çalışacağıq. Hər şey ola bilər. "Qarabağ"ı keçə bilməsək, rəqibə növbəti mərhələdə uğurlar arzulayacağıq.

- Oyundan sonra alqışlayırdınız? Kimə ünvanlanmışdı?
- Hər iki komandaya. Çünki yaxşı oyun sərgilədilər.