Roman Qriqorçuk: MTK Samtredia ilə müqayisədə tam fərqli stildə oynayır
"Qəbələ"nin baş məşqçisi Roman Qriqorçukun azerisport.az saytına müsahibəsi
- Avropa Liqasının ikinci təsnifat mərhələsində qarşılaşacağınız Macarıstan MTK-sı ilə oyunlara hazırlıq necə gedir?
- Hər şey plan üzrə davam edir. Sakitcə çalışırıq. Başa düşürük ki, çox iş görməyə vaxtımız yoxdur. Amma hər şeyin normal olduğunu görürəm.
- Rəqib barədə nə deyə bilərsiniz?
- Ciddi komandadır. MTK-nın yaxşı heyəti var. Əsas hücumçularının İngiltərə Premyer Liqasında oyun təcrübəsi var. Bu, çox şeydən xəbər verir. Fiziki cəhətdən güclü komandadır.
- "Samtredia"dan güclüdürlər?
- Belə bir müqayisə aparmaq fikrim yoxdur. Çünki fərqli stildə oynayan komandalardır.
- Növbəti mərhələyə adlamaq şansınız necədir?
- Hamı mənim şanslara necə yanaşdığımı bilir. Azacıq da olsa, şans varsa, buna görə meydanda ölməyə də hazır olmalıyıq. Amma hazırda bir faiz yox, daha çox şansımızın olduğunu düşünürəm.
- İlk oyundan nə gözləyək?
- Fikrimcə, Gürcüstandakından daha yaxşı oynayacağıq. Çünki həmin oyunu istədiyimiz kimi keçirmədik. Rəqib də çox yaxşı çıxış etdi.
- İlk oyundakı qələbədən sonra hamı indiki "Qəbələ"nin ötən mövsümdəkindən daha güclü olduğunu deməyə başladı...
- Mən ümumiyyətlə müqayisə aparmaq istəməzdim. Bir-iki oyuna görə belə nəticə çıxarmaq düz deyil. Bu üzdən də indiki mərhələdə bu barədə danışmaq mənə çətindir.
- "Qəbələ" rəhbərliyi səfərə Avroliqadakı digər təmsilçimiz "Kəpəz"lə birgə yollanmağı təklif etdi. Bu, sizi narahat etmir?
- Bunu öncədən də bilirdim və burada heç bir problem görmürəm. Belə hallar digər klublarda da olur. Vaxtilə Ukraynada da bu təcrübədən yararlanıblar. Qənaət baxımından bu, çox düzgün yanaşmadır.
- İki rəqib bir təyyarəyə sığacaq?
- Hazırda biz rəqib deyilik. Avroliqada iştirak edən iki həmkarıq.
- "Kəpəz"in baş məşqçisi Şahin Diniyevlə söhbətləşəcəksiniz?
- Mənim onu gec də olsa, yubileyini təbrik etmək imkanım olacaq. Təbii ki, klub rəhbərliyi, məşqçilər korpusu ilə də məmnuniyyətlə söhbətləşəcəyəm. Hər kəsə hörmətlə yanaşıram.
