Dario Federiko: Admiranı da keçmək istəyirik
"Kəpəz"in yarımmüdafiəçisi Dario Federiko Avropa Liqasının birinci təsnifat mərhələsi çərçivəsində Moldova "Daçiya"sına qarşı keçirdikləri səfər oyunundan (1:0, ilk oyun 0:0) sonra azerisport.az saytının suallarını cavablandırıb.
- "Daçiya" ilə səfər matçının qəhrəmanı oldunuz. Vurduğunuz qol komandanızı tarixində ilk dəfə avrokubokların növbəti mərhələsinə daşıdı...
- Bu qol məni də sevindirdi. Çünki klubuma faydalı oldu. Bu, "Kəpəz", Gəncə üçün tarixi qələbədir. Səfərdə uğurlu çıxış etməyi çox istəyirdik. Buna da nail olduq.
- Həmin epizodda qol vuracağınıza əmin idiniz? Çünki qolda rəqib qapıçının səhvi də köməyinizə çatdı...
- Zərbədən öncə qapıçıya da baxdım. Qərara aldım ki, zərbə vurmağa dəyər. Nəticədə bizə qələbə qazandıran qol qeydə alındı.
- Uzun müddət zədədən əziyyət çəkən Darionun artıq əvvəlki formasına qayıtdığını demək olar?
- İlk oyunda da pis çıxış etməmişdim. Amma ikinci oyunda komandama daha çox kömək etdim. Əlbəttə, bu qol mənim özüməinamımı da artırdı. Futbolsevərlər bundan sonra əvvəlki Darionu görə biləcəklər.
- Komandanı yeni transferlərlə gücləndirməyə ehtiyac var?
- Yaxşı komandamız var. Yaxşı heyətlə yanaşı, yaxşı da baş məşqçimiz var. Çempionatda mövsüm bitən kimi bir neçə futbolçu komandamızı tərk etdi. Mən yeni transferlərin olub-olmayacağını bilmirəm. Gələn olsa, təbii ki, komandaya kömək edə bilərlər. Amma "Kəpəz" indi də uğurlu çıxış edir. "Daçiya"nı keçməyimiz də buna sübutdur.
- Qarşıda sizi Avstriya "Admira"sı gözləyir...
- Rəqibin yaxşı komanda olduğunu bilirəm. Amma biz bu komandaya qarşı uğurlu oynamaq, öz oyunumuzu sərgiləmək və mərhələ adlamaq istəyirik.
- Sizinlə zədədən öncə bəzi klublar maraqlanırdı...
- Bəli, Azərbaycanın güclü klublarından maraqlananlar var idi. Bir təklif daha yaxşı idi. Amma bunu ailəmlə müzakirə etdim və "Kəpəz"də qalmağa qərar verdim.
