Sergey Zenyov: Topun qapı dirəyindən qayıtması üzücü idi
"Qəbələ"nin hücumçusu Sergey Zenyov Avropa Liqasının birinci təsnifat mərhələsi çərçivəsində Gürcüstan "Samtredia"sına qarşı keçirdikləri cavab oyunundan (1:2, ilk oyun – 5:1) sonra azerisport.az saytının suallarını cavablandırıb.
- Əlavə olunmuş dəqiqələrdə qol buraxaraq uduzduğunuz cavab oyununu necə şərh edə bilərsiniz?
- Hər şey qaydasındadır. Əsas odur ki, mərhələni keçən biz olduq. Amma bu oyunu analiz edib, öz səhvlərimizi başa düşməliyik.
- "Samtredia"nın heyətində kimi qeyd edərdiniz?
- Düzünü desəm, mən meydan sahiblərinin oyunçularına diqqət yetirmirdim. Mənim üçün daha vacib olan öz komandamızın oyunu idi.
- İkinci hissədə xüsusi fəallıq nümayiş etdirdiniz. Bu oyunda ən çox təəssüfləndiyiniz məqam yəqin ki, 100 faiz qolu qaçırmağınız oldu...
- Əlbəttə, topun qapı dirəyindən qayıtması çox üzücü oldu. Yüz faizlik qol şansını qaçırdıq. Sadəcə, həmin epizodda şans məndən üz döndərdi.
- Daha bir epizodda Tellur Mütəllimova ötürmə vermək qərarına gəldiniz...
- Artıq bir epizodda qapı dirəyini nişan aldığıma görə, ötürmə verməyi üstün tutdum ki, bəlkə qol olar.
- Növbəti mərhələdə qarşılaşacağınız Macarıstan MTK-sı barədə nə deyərdiniz?
- Bizim üçün kiminlə oynamağımızın fərqi yox idi. Şəxsən mən indiyə qədər Macarıstan klublarının oyunlarına baxmamışam və bu komanda barədə də heç bir məlumatım yoxdur. Amma tezliklə rəqib haqda informasiya toplamağa başlayacağam.
- Klub rəhbərliyi daha bir hücumçu almağa hazırlaşır. Əsas heyətdən kənarda qalacağınızdan qorxmursunuz?
- Qorxuram ki, kənarda qalaram (gülür). Əlbəttə, bu, zarafatdır. İnanıram ki, yeni transfer komandanın daha da güclənməsinə kömək edəcək.
