Elnur Cəfərov: Mxitaryanın yaşında mən də güclü klubda çıxış edəcəyəm
Portuqaliyanın "Tondela" klubunun azərbaycanlı yarımmüdafiəçisi Elnur Cəfərov özünün erməni futbolçu Henrix Mxitaryanla müqayisə olunmasına münasibət bildirib. Azerisport.az saytına açıqlamasında o, bunları söyləyib:
"Bu, mənim üçün çox məsuliyyətli məqamdır. Erməni futbolçu İngiltərənin "Mançester Yunayted" klubuna transfer olunursa, niyə azərbaycanlı oyunçular da Avropanın adlı-sanlı klublarında çıxış etməməlidir ki? Mxitaryanın neçə yaşı var, bilmirəm. Amma mənim hələ yaşım azdır. Bu, ilk xarici klubumdur. Ümid edirəm ki, Mxitaryanın yaşına çatanda mən də Avropanın güclü klublarından birində çıxış edəcəyəm. Amma bunun üçün üzərimdə hələ çox çalışmalıyam. Azərbaycanlı futbolçunun Avropanın güclü bir klubunda çıxış etməsi üçün özümdən asılı olan hər şeyi edəcəyəm. Bəzi adamlar yazırlar ki, Elnur da əksər azərbaycanlı futbolçular kimi bir müddət sonra vətənə qayıdacaq. Lakin mən Portuqaliyaya yenidən Azərbaycana qayıtmaq üçün gəlməmişəm. Hədəfim Avropada qalmaqdır. "Tondela" mənim üçün tramplin olmalıdır. Azarkeşlərin artıq "ermənilərin Mxitaryanı varsa, bizim də Cəfəromuz var" tipli açıqlamalar yazdığını oxumuşam. Bütün bunlar məsuliyyətimi daha da artırır".
