Tellur Mütəllimov: Səfərdəki məğlubiyyət məni təəccübləndirmədi

"Qəbələ"nin yarımmüdafiəçisi Tellur Mütəllimov Avropa Liqasının birinci təsnifat mərhələsi çərçivəsində Gürcüstanın "Samtredia" klubuna qarşı keçirdikləri cavab oyunundan (1:2, ilk oyun 5:1) sonra fikirlərini bölüşüb. Azerisport.az saytına açıqlamasında o, bunları söyləyib:

"Bakıdakı oyundan sonra da "Samtredia"nın güclü komanda olduğunu demişdim. Bu gün bir daha bunun şahidi olduq. Ona görə də cavab matçının nəticəsi məni təəccübləndirmədi.

Öz oyunuma gəlincə, orta səviyyəli futbol sərgilədim. Növbəti oyunlarda daha yaxşı oynamağa çalışacağam. Əlbəttə, həyəcan var idi və mənə mane oldu. Amma oyundan oyuna həyəcan azalır. "Samtredia"ya həm Bakıda, həm də Zestafonidə qol vura bilərdim. Amma əfsuslar olsun ki, şansımı əldən verdim. Eyni zamanda mənə elə gəlir ki, Daboya qol ötürməsi etdiyim epizodda ofsayd yox idi".