Səməd Qurbanov: Neftçi istənilən rəqibə qarşı oynaya bilər
"Neftçi"nin Müşahidə Şurasının üzvü Səməd Qurbanov Avropa Liqasının birinci təsnifat mərhələsi çərçivəsində Malta "Baltsan"ı ilə cavab oyunu öncəsi fikirlərini bölüşüb. Azerisport.az saytına açıqlamasında o, bunları söyləyib:
"İlk oyunun nəticəsi "Neftçi"ni arxayınlaşdıra bilməz. Komanda cavab görüşünə də ciddi yanaşır. Uğurlu startın davamını gətirmək lazımdır. Azarkeşlərin inamını geri qaytarmaq önəmlidir. Bizi heç-heçə də qane edəcək, amma heç-heçəyə oynamaq olmaz. Qələbə qazanmaq lazımdır. Növbəti mərhələdəki rəqiblər barədə düşünmək lazım deyil. Makedoniya "Şkendiya"sı doğma meydanda Polşa "Krakoviya"sına qalib gəlsə də (2:0), bu, onların növbəti mərhələyə çıxmasına zəmanət vermir. Polşalılar cavab görüşündə vəziyyəti dəyişə bilərlər. Amma bizim üçün Makedoniya klubu ilə oynamaq daha yaxşı olardı. İstənilən halda "Neftçi"də yaxşı atmosfer var və komanda matçdan matça daha da artıracaq. İstənilən rəqiblə oynaya bilərik".
