Sergey Zenyov: Səfərdə də qələbəyə oynayacağıq

"Qəbələ"nin hücumçusu Sergey Zenyov Avropa Liqasının birinci təsnifat mərhələsi çərçivəsində Gürcüstan "Samtredia"sına qarşı keçiriləcək cavab oyunu öncəsi azerisport.az saytının suallarını cavablandırıb:

- Gürcülərlə ilk oyunun nəticəsi bir qədər gözlənilməz oldu...
- Prinsipcə, hesab bizim üçün də gözlənilməz oldu. Şübhəsiz ki, qələbəyə inanırdıq. Amma hesabın belə olacağını gözləmirdik. Hamımız nəticədən razıyıq. Bu, cavab matçı öncəsi optimal variantdır.

- "Qəbələ"nin artıq növbəti mərhələyə vəsiqəni təmin etdiyini demək olar?
- Gəlin erkən nəticə çıxarmayaq. Cavab oyununa da ciddi hazırlaşırıq.

- Səfərdə də qələbəyə oynayacaqsınız?
- Əlbəttə. Əks halda niyə bura gəlirdik ki?

- "Samtredia" "Qəbələ"yə problem yaradacaq gücdədir?
- Rəqibimiz doğrudan da yaxşı komandadır. Sadəcə, Bakıdakı oyunda biz çox yaxşı oynadıq və ələ düşən şanslardan yaxşı yararlandıq.

- Oyundan öncə sizin tam hazır olmadığınız deyilirdi. Amma siz meydana çıxıb, hətta qol da vurdunuz...
- Əlbəttə, yüz faiz hazır olduğumu deməzdim. Amma həmin oyunda hər şeydən razı qaldım.

- "Qəbələ"nin yeni transferlərindən Teo Uiks debüt oyununda het-trik etdi. Bunu necə qarşıladınız?
- Onun oyunu, vurduğu üç qol hər şeydən xəbər verir. Onun necə futbolçu olduğunu hamımız gördük. Əlavə nəsə danışmağa ehtiyac görmürəm.

- İndiki "Qəbələ" daha güclüdür, ya ötən mövsümkü?
- (gülür) Dəqiq bircə onu deyə bilərəm ki, belə bir müqayisə aparmayacağam. Ötən mövsüm də yaxşı komandamız var idi, indi də.

- Ötən mövsüm birgə oynadığınız futbolçular üçün darıxmırsınız?
- Əlbəttə, darıxıram. Çünki dostluq edirdik, ailələrimiz arasında münasibət var idi.

- Gözləriniz oyun zamanı Aleksey Qayı axtarmırdı?
- (gülür) Yox. Əlbəttə, darıxıram, amma o qədər də yox. İndi komandamızda başqa futbolçular var.

- Mərhələ adlayacağınız halda alacağınız mükafatla bağlı rəhbərliklə söhbətiniz olub?
- Bu, artıq klubumuzun daxili işidir. Onu müzakirə etməyəcəyik (gülür).