Vəli Qasımov: Neftçi Şkendiya və Krakoviyanı da keçəcək gücdədir
"Neftçi"nin baş məşqçisi Vəli Qasımovun azerisport.az saytına müsahibəsi
- Avroliqanın birinci təsnifat mərhələsi çərçivəsində iki cavabsız qolla üstələdiyiniz Malta "Baltsan"ı ilə cavab matçına hazırlıq necə gedir?
- Hazırlığa fasiləsiz, istirahət etmədən start vermişik. Hələ ki, hər şey yaxşı gedir. Heyətdə itki yoxdur.
- İlk oyundan razı qaldınız?
- Komandamız özünü pis göstərmədi. Meydanda anlaşılmazlıqlar da oldu. Amma bu, təəccüblü olmamalıdır. Çünki heyətdə beş yeni futbolçu var. Onlara vaxt lazımdır. Lakin bəzi anlarda meydanda çox yaxşı oyunun da şahidi olduq.
- Səfərdəki 2:0 cavab oyunu öncəsi arxayınlıq yaratmaz?
- Buna yol vermək olmaz. Cavab oyununda da imkanlarımızdan 100 faiz istifadə etməliyik. Səfərdəki qələbə bizim növbəti mərhələyə çıxmağımızı təmin emtəyib. Rəqib buraya revanş üçün gələcək. Bu üzdən də oyuna ciddi hazırlaşmalıyıq.
- "Baltsan" gözlədiyinizdən zəif rəqib çıxdı?
- Rəqibi zəif hesab etmirəm. Bu komandada xeyli təcrübəli futbolçu var. Keyfiyyətli ifaçılara malikdir. Ola bilsin ki, bizə qarşı istədikləri oyunu göstərə bilmədilər. Amma bu, onların zəif olmasından xəbər vermir.
- Yeni transferlərdən razı qaldınız?
- Bəzisindən. Amma yenə deyirəm ki, onların özlərini tam göstərməsi üçün zamana ehtiyac var. Səviyyə baxımından isə yaxşı futbolçu olduqlarını deyə bilərəm. Onların bizə çox faydası dəyəcək.
- Potensial rəqiblərinizin oyununda Makedoniya "Şkendiya"sının Polşa "Krakoviya"sına 2 cavabsız qolla qalib gəlməsi sizin üçün nə dərəcədə gözlənilən oldu?
- Belə nəticəni gözləmirdim. Amma oyuna baxdım. Makedoniyalılar layiqli qələbə qazanıb.
- Növbəti rəqibinizin kim olmasından asılı olmayaraq, dişinizə görə olacağını söyləmək olar?
- Hər halda superklub deyillər. Hər iki komandanı keçəcək gücdəyik.
- Avroliqaya uğurlu startdan sonra iştahınız artmayıb?
- Bizə bu turnirə yaxşı başlamaq vacib idi. İkinci oyun da çox vacibdir. Bu, yaxşı motivasiya olacaq. Əlbəttə, "Baltsan" böyük klub deyil. Amma bundan sonra da Malta təmsilçilərinə qarşı oynamayacağıq. Növbəti mərhələlərdə bizi daha ciddi sınaqlar gözləyir.
- Heyəti tam komplektləşdirə bilmisiniz?
- Tam yox. Heyətimiz elə də böyük deyil. Futbolçu çatışmazlığı var. Potensial yeni futbolçuları nəzərdən keçiririk. İlk növbədə hücumçu almağı düşünürük.
