Nelson Bonilya: Nə vaxtsa yenidən Azərbaycana qayıdacağıma ümid edirəm
"Zirə"nin sabiq hücumçusu, Portuqaliyanın "Nasyonal" klubunun salvadorlu futbolçusu Nelson Bonilyanın azerisport.az saytına müsahibəsi
- "Nasyonal"a keçidinizlə bağlı nə deyə bilərsiniz?
- Bu transferin baş tutmasına sevinirəm. Mənim, karyeram üçün uğurlu addım oldu. Ümid edirəm ki, yeni komandamda da uğurlu çıxış edə biləcəyəm.
- Özünüzü Portuqaliya çempionatına hazır hiss edirsiniz?
- Tam hazıram. Sadəcə, uyğunlaşmaq üçün müəyyən zamana ehtiyacım var. Portuqaliya çempionatında meydana çıxacağım günü səbrsizliklə gözləyirəm.
- Son müsahibə zamanı "Zirə"dən niyə ayrıldığınızı bizə demək istəməmişdiniz...
- Sadəcə, "Nasyonal"dan aldığım təklifə görə. Dediyim kimi, Portuqaliya çempionatı Avropanın 10 ən güclü çempionatından biridir. "Nasyonal"da oynamaq da irəliyə doğru atılmış addımdır.
- "Zirə"ni tərk edən digər legioner futbolçu - ispaniyalı Tato buranı süni örtüklü meydanda oynamaq istəmədiyinə görə tərk etdiyini deyib...
- Ola bilsin ki, Tato üçün elədir. Amma mənim üçün süni örtük problem deyildi. Sadəcə, karyeramda dəyişiklik etmək istəyirdim və buna görə də Portuqaliyaya yollandım. Başqa səbəb axtarmağa dəyməz.
- "Qarabağ"a da keçəcəyiniz deyilirdi. Ağdam klubundan da təklif alsaydınız, seçiminiz necə olardı?
- Bu barədə heç nə deyə bilmərəm. Çünki heç bilmirəm "Qarabağ" məni rəsmən istəyirdi, ya yox. Rəsmi təklif olsaydı, o zaman bu barədə nəsə danışmaq olardı. Amma nə vaxtsa yenidən Azərbaycana qayıdacağıma ümid edirəm. Lakin hansı kluba, bunu indi demək çətindir. Bakını, xalqınızı çox sevdim.
- Bəs Azərbaycan futbolu ilə bağlı fikirləriniz necədir?
- Çempionatınızın inkişafda olması xoşuma gəlirdi. Matçlar çox maraqlı keçirdi. Orada olduğum müddətdə gördüm ki, yaxın illərdə Azərbaycan Premyer Liqası Avropanın güclü çempionatlarından birinə çevrilə bilər. Sadəcə, təşkilatçılıq baxımından müəyyən problemlər var. Bunu nəzərə almasaq, Azərbaycan futbolunda hər şey xoşuma gəlirdi.
