Şahin Diniyev: Bakıda qol buraxmaq istəmirik

"Kəpəz"in baş məşqçisi Şahin Diniyev Avropa Liqasının birinci təsnifat mərhələsində Moldova "Daçiya"sına qarşı keçirəcəkləri ilk oyun öncəsi bu gün mətbuat konfransında fikirlərini bölüşüb. Azerisport.az xəbər verir ki, o, öncə bunları söyləyib:

- Bizim üçün çox vacib oyundur. Çətin olacaq. Uğurlu çıxış etməyə çalışacağıq. İdeal formada deyilik. Amma hər şey o dərəcədə pis də deyil. Ərzurum toplanışı bizim üçün çox faydalı alındı. Lakin oyun təcrübəmiz azdır. Beş futbolçu ilk dəfə "Kəpəz"də oyuna çıxacaq. Çətinliklərə sinə gərəcəyimizə ümidliyəm. Azarkeşləri evə razı yola salmağa çalışacağıq. Amma hər şeyə Moldovadakı cavab oyununa aydınlıq gələcək.

- "Kəpəz"in 16 il sonra yenidən avrokuboklara qayıtmasının mənfi təsiri çoxdur, ya müsbət?
- Avroliqada oynamaq hər futbolçuya nəsib olmur. Yetirmələrim üçün bu, bir şansdır. Onlar özlərini göstərmək üçün alışıb yanırlar. Bunun üzərində çalışırıq. Nə olursa olsun, bununla həyat bitmir. "Kəpəz"i növbəti mövsümdə daha ağır oyunlar gözləyir.

- Bakıdakı oyunda istədiyiniz azarkeş dəstəyini görə biləcəyinizə əminsiniz?
- Bu işlə rəhbərlik məşğul olur. Bu yöndə böyük iş görüldüyünü eşitmişəm. Amma onu dəqiq bilirəm ki, dəstəksiz qalmayacağıq. Tribunalarda azı 3-4 min azarkeş gözləyirəm.

- Rəhbərlik qarşınıza hansı tapşırıq qoyub?
- Rəhbərlik məndən konkret hansısa nəticə tələb etmir. Amma biz yaxşı çıxış edib, uğurlu nəticə qazanmağa çalışacağıq. Aramızda 100 faizlik anlaşma var.

- Sabah hücum futboluna üstünlük verəcəksiniz, ya müdafiədən oynayacaqsınız?
- Həm hücumda, həm də müdafiədə inamlı çıxış etməliyik. Qol buraxmaq istəmirik. İlk dəqiqələrdən ehtiyatlı oynamağa çalışacağıq.