Pol Fenek: Neftçiyə qarşı ilk oyunu Bakıda keçirməyimiz daha yaxşı olardı
Maltanın "Baltsan" klubunun yarımmüdafiəçisi Pol Fenek Avropa Liqasının birinci təsnifat mərhələsi çərçivəsində "Neftçi"yə qarşı keçirəcəkləri oyunlar ərəfəsində azerisport.az saytının suallarını cavablandırıb.
- Püşk sizi "Neftçi"yə rəqib etdi. Bu rəqiblə oyunlardan nə gözləyirsiniz?
- Fikrimcə, yaxşı oyunlar olacaq. Biz Avroliqanın hazırlığına hələ püşkatmadan öncə başlamışıq. Ola bilər ki, çox adam bizim klubu qeyri-peşəkar hesab edir. Amma biz "Neftçi" ilə oyunlara peşəkar səviyyədə və çox ciddi hazırlaşırıq. Asan oyun olmayacağını bilirik.
- Favorit hansı komandadır?
- Heç kim "Neftçi"nin favorit olduğunu deyə bilməz. Hər bir oyun ağır olur. Amma bu barədə hələ heç nə demək istəmirəm. Çünki heç ilk oyunumuz keçirilməyib.
- Bakılıları keçəcəyinizə inanırsınız?
- Bizim üçün çox vacib oyunlardır. Təbii ki, özümüzə inanırıq.
- Rəqib barədə nə bilirsiniz?
- Yaxşı komanda olduğunu bilirəm. Amma futbolçularınız barədə elə də ətraflı məlumatım yoxdur. Hər halda məşqçilərimiz rəqib barəsində məlumat toplayıb. Onla bizə lazım olan məlumatları, "Neftçi"yə qarşı necə oynamaq lazım olduğunu söyləyəcəklər.
- İlk oyunun Malta keçirilməsi sizin üçün üstünlükdür, ya rəqib üçün?
- Bunu özümüz üçün üstünlük saymıram. Səfərdə oynasaydıq, daha yaxşı olardı. Amma bütövlükdə bunun elə də böyük əhəmiyyəti yoxdur.
- Bir müddət öncə Azərbaycan və Malta yığmaları arasında keçirilmiş seçmə mərhələ oyununda siz də iştirak etmişdiniz...
- Azərbaycana qarşı yalnız Bakıdakı oyunda iştirak etdim və 0:2 hesabıyla uduzduq. Amma düşünmürəm ki, Azərbaycan yığması ilə "Neftçi" oxşar oyun sərgiləyir.
