Julien Ebah: Avroliqada mümkün qədər çox irəli getməyə çalışacağıq

"Kəpəz"in hücumçusu Julien Ebahın azerisport.az saytına müsahibəsi

- Bir neçə gün sonra "Kəpəz" 16 illik fasilənin ardından ilk avrokubok matçına çıxacaq. Həyəcan varmı?
- Bundan mənim də xəbərim var. Həyəcan həmişə olur. Amma biz matça yaxşı hazırlaşmışıq.

- Rəqib Moldova "Daçiya"sıdır. Bu komandanı keçə biləcəksiniz?
- İndidən bu haqda danışmaq tezdir. Hələ ilk oyun başlamayıb. Amma rəqib barədə öz fikrimi deyə bilərəm. Yaxşı komandadır. Moldova çempionatının gümüş mükafatçısıdır. Fikrimcə, bu, rəqibin gücündən xəbər verir.

- Belə çıxır ki, "Kəpəz"in mərhələ adlamaq şansı azdır?
- "Daçiya" yaxşı komandadır. Onlara qarşı oynamaq elə də asan olmayacaq. Amma şanslar bərabərdir. Hər iki komanda qələbə qazanmağa çalışacaq. Növbəti mərhələyə isə bunu daha çox istəyən komanda adlayacaq.

- İlk oyunun Bakıda keçirilməsi hansı komanda üçün üstünlükdür?
- Biz seçim imkanına malik deyilik. İlk oyun Bakıdadırsa, deməli, meydana çıxıb, öz oyunumuzu göstərməliyik. Bizim üçün bu, vacibdir. İlk oyunda çox qol vurub, qapımızı toxunulmaz saxlamalıyıq.

- "Kəpəz"in heyətinə qoşulan iki yeni legionerlə bağlı fikirləriniz necədir?
- Normal oyunçulardır. Əsas odur ki, təcrübəlidirlər və bizə kömək edə biləcəklər.

- Azarkeşlər sizdən çox şey gözləyirlər. Onlara qol sözü verə bilərsiniz?
- Azarkeşlərin dəstəyinə ehtiyacımız var. Oyun Gəncədə yox, "Dalğa Arena"da keçiriləcək. Buna baxmayaraq, onların lazım olan dəstəyi nümayiş etdirəcəyinə inanıram. Onları sevindirmək üçün əlimizdən gələni edəcəyik.

- "Kəpəz"in hədəfi nədən ibarətdir?
- Avropa Liqası hər bir futbolçu üçün önəmli turnirdir. Biz mümkün qədər irəli getməyə və azarkeşlərimizi sevindirməyə çalışacağıq.