Rəşad Eyyubov: Favorit barədə ilk oyundan sonra danışmaq olar
"Qəbələ"nin yarımmüdafiəçisi Rəşad Eyyubovun azerisport.az saytına müsahibəsi
- Avropa Liqasının püşkünü klubunuz üçün necə dəyərləndirərdiniz?
- Normal. Fikrimcə, bizə zəif komanda düşməyib. Bizi "Samtredia" ilə iki maraqlı oyun gözləyir. Bu mərhələdə belə rəqiblə üz-üzə gəlmək tam normaldır.
- Ötən mövsüm Avroliqaya Tiflis "Dinamo"su ilə başladınız, bu mövsüm "Samtredia" ilə...
- Bu ki yaxşıdır. Uzağa getmirik. Həm də rəqib barədə informasiya tapmaq üçün çətinlik olmur.
- Razısınız ki, ötən mövsüm Avroliqanın qrup mərhələsinə vəsiqə qazanan heyət indikindən daha güclü idi?
- Bununla razılaşmıram. Bizim indi də normal heyətimiz var. Yeni gələn oyunçular da klubun iddialarına tam cavab verirlər.
- "Qəbələ" cütün favoritidir?
- Fikrimcə, ilk mərhələdə favorit yoxdur. Yalnız ilk oyundan sonra favorit barədə danışmaq olar. İndi çox tezdir.
- İlk oyunu evdə keçirməyiniz sizin üçün üstünlükdür, ya rəqib üçün?
- İlk oyunda "Samtredia"nı 5:0 hesabıyla məğlub etsək, ilk oyunu evdə keçirməyimizi bizim üçün üstünlük saymar olar (gülür). Ev oyununda qol buraxmamaq çox vacibdir.
- "Qəbələ" cəmi 16 futbolçu sifariş edib...
- Nəzərə alsaq ki, meydana cəmi 11 futbolçu çıxacaq, bu, elə də pis deyil. 12 oyunçu da sifariş etmək olar (gülür).
- Gürcüstan toplanışında keçirdiyiniz yerli "Dila" ilə oyunda (2:0) meydanda olsanız da, ötən gün "Sioni"yə qarşı oynamadınız (4:0).
- Allergiya səbəbindən gecəni xəstəxanada keçirmişəm. Oyunu da buna görə buraxdım. Amma bu qələbə bizi yanıltmamalıdı. Hədəfimiz 30 iyunda keçiriləcək oyuna hazır olmaqdır. Çünki yoxlama oyunları rəsmi matçlardan çox fərqlənir.
