Elvin Bədəlov: Baltsan yüksək səviyyəli komanda olmasa da, bizə çətin olacaq
"Neftçi"nin müdafiəçisi Elvin Bədəlov Avropa Liqasının birinci təsnifat mərhələsində qarşılaşacaqları Malta "Baltsan"ı ilə oyun öncəsi fikirlərini bölüşüb. Azerisport.az saytına açıqlamasında o, bunları söyləyib:
"Baltsan" haqda yaxın günlərdə daha ətraflı məlumatımız olacaq. Oyuna ciddi hazırlaşırıq. Rəqib yüksək səviyyəli komanda olmasa da, fikrimcə, bizi çətin oyunlar gözləyir. Onlar yəqin ki, sonadək mübarizə aparmağa çalışacaqlar. Amma biz mərhələ adlamaq üçün əlimizdən gələni edəcəyik".
Bədəlov "SIBM Traning Center"ə qarşı keçirdikləri ilk yoxlama oyunundakı məğlubiyyətdən (1:2) də söz açıb: "Yeganə qolu ilk hissədə vurduq. Amma ondan sonra da xeyli qol şansımız oldu. Təəssüf ki, yenə qol şanslarını dəyərləndirməkdə çətinlik çəkirik. Sən vurmursan, rəqib fərqlənir. İstənilən halda bu, bir yoxlama oyunu idi. İndi yüklənmə də çoxdur. Fikrimcə, matçdan matça daha da artıracağıq".
