Vançe Şikov: İqor Mitreski məni əmin etdi ki, Neftçiyə keçməyə dəyər

Makedoniya yığmasının müdafiəçisi Vançe Şikov "Neftçi"yə transferi ilə əlaqədar azerispot.az saytının suallarını cavablandırıb.

- Bakı klubuna keçidinizlə bağlı nə deyə bilərsiniz?
- Fikrimcə, çox yaxşı komandaya keçdim. Müqavilə imzalamazdan öncə İqor Mitreski ilə də söhbətləşdim. O, məni əmin etdi ki, bu komandaya keçməyə dəyər. Artıq hazırlaşacağam və özümü göstərməyə çalışacağam.

- Neçə illik müqavilə bağladınız?
- Bir illik. Amma müddət daha bir il də uzadıla bilər.

- Mayda Avstriya toplanışı çərçivəsində keçirilən Azərbaycan - Makedoniya matçında siz də iştirak etmişdiniz. Sizi həmin oyunda gözaltı ediblər?
- Xeyr. Bakı klubu mənimlə həmin oyundan əvvəl maraqlanırd.

- "Neftçi"yə nə vaxt qoşulacaqsınız?
- Artıq bu gün məşqlərə başlayacağam.

- Yeni komandanız, Azərbaycan çempionatı barədə nə bilirsiniz?
- Hər ikisi barədə az məlumatım var. Düzdür, ümumi təsəvvürüm var. Bunu da vaxtilə Azərbaycanda oynamış futbolçulardan öyrənmişəm. Mənə "Neftçi"nin ölkənin ən böyük klublarından biri olduğunu söyləyiblər.

- Azərbaycan futbolunda maliyyə şərtləri getdikcə pisləşir. "Neftçi"nin təklif etdiyi məbləğ sizi qane edir?
- Bu barədə heç nə danışmaq istəmirəm. Müqavilə artıq imzalanıb.

- Komandanızı Avropa Liqasının birinci təsnifat mərhələsi çərçivəsində Malta "Baltsan"ı ilə oyun gözləyir. Rəqib barədə nə bilirsiniz?
- Heç nə bilmirəm. Bircə onu eşitmişəm ki, yaxşı bir futbolçu ilə müqavilə imzalayıblar.

- Rəqib barədə heç nə bilməmək onu qiymətləndirməməyə gətirib çıxarmayacaq ki?
- Buna imkan verməməliyik. Birinci mərhələni keçməliyik.