Vəli Qasımov: Püşkdən razı qaldım, amma çoxlu güc sərf etməli olacağıq

"Neftçi"nin baş məşqçisi Vəli Qasımovun azerisport.az saytına müsahibəsi

- Püşk sizə Malta "Baltsan"ını rəqib etdi. Avroliqanın püşkündən razı qaldınız?
- Razıyam. Daha pis də ola bilərdi. Malta futbolu yaxşı reytinqə malik olmasa da, indi hamı futbol oynamağı bacarır.  Bu üzdən çətin ki, biz bu komandanı asanlıqla keçək. Hətta deyərdim ki, növbəti mərhələyə vəsiqə qazanmaq üçün xeyli güc sərf etməli olacağıq.

- İlk oyun səfərdə keçiriləcək. Bunun sizə hansısa xeyri var?
- Hələ harada oynayacağımızı dəqiq bilmirəm. Böyük önəm daşımasa da, bir üstünlükdür. İlk oyunda uğurlu çıxış etmək vacibdir. Komanda hazırda Türkiyədə toplanışdadır. İlk oyun səfərdə olsa, Maltaya elə buradan yollanacağıq.

- Rəqibi yaxşı analiz etmək çətin olmayacaq?
- Bizim rəqib barədə informasiya toplamaq üçün vaxtımız var.

- Komanda iyunun 30-na qədər hazır olacaq?
- Toplanışa elə də çoxdan başlamamışıq. Təbii ki, hələ ideal formadan uzağıq. Amma ilk oyuna qədər ideal formamıza mümkün qədər yaxınlaşmağa çalışacağıq. Oyundan oyuna da artırmağımız lazımdır.

- Çernoqoriyalı qapıçı Milan Miyatoviçi artıq "Neftçi"nin futbolçusu saymaq olar?
- Danışıqlar hələ yekunlaşmayıb. Amma məncə, bu yöndə hansısa problem olmaz.

- Bəs makedoniyalı Vançe Şikov?
- Hələ bu futbolçu ilə bağlı sizə konrket bir söz deyə bilmərəm.