Dmitri Kramarenko: Premyer Liqa üçün 8 klub çox azdır

"Neftçi"nin qapıçılarla iş üzrə məşqçisi Dmitri Kramarenkonun azerisport.az saytına müsahibəsi

- Toplanış necə gedir?
- Hər şey normaldır. Komandada atmosfer yaxşıdır. Uşaqlar məşqlərdə yüz faiz güc sərf edirlər.

- Aqil Məmmədovun komandadan ayrılmasını necə qarşıladınız?
- Aqil yaxşı mövsüm keçirdi. Amma müqaviləsinin müddəti bitmişdi. Görünür, yeni müqavilənin şərtləri qane etmədiyi üçün ayrıldı. Ona gələcək karyerasında uğurlar.

- Yeni aldığınız çernoqoriyalı qapıçı barədə nə deyərdiniz?
- Hələ nəsə demək çətindir. Bizimlə cəmi bir neçə məşqə çıxıb. Təcrübəlidir, ölkəsinin yığma komandasında oynayıb. Hər şeyə baş məşqçi Vəli Qasımov qərar verəcək. Mən sadəcə, məsləhət verə bilərəm.

- "Neftçi" yenidən legionerlərlə güclənməyə başlayıb. Klub əcnəbilərə üstünlük vermək qərarına gəlib?
- Bunu baş məşqçidən soruşmağınız daha yaxşı olar. Çünki bu barədə qərarları o verir.

- "Neftçi"nin yeni mövsümdə güclü olacağını söyləmək olar?
- Klubda çalışan hər bir kəs də məhz buna çalışır. "Neftçi" hər il güclü olmalıdır.

- Bu gün Avropa Liqasının birinci təsnifat mərhələsindəki rəqibiniz bilinəcək. Münasib rəqib gözləyirsiniz?
- Əlbəttə, istərdim ki, ilk mərhələdə zəif rəqiblə düşək. Gücümüzə görə rəqib istəyirik.

- Növbəti mövsümdə elitada cəmi 8 klub mübarizə aparacaq. Sizin buna münasibətiniz necədir?
- Mingəçevir, Şəmkir, Tovuz, Qazax, Zaqatala kimi regionların Premyer Liqada təmsil olunmaması çox pisdir. İndi də "Xəzər Lənkəran", "Bakı", "Rəvan"ı itirməkdəyik. 8 komanda təbii ki, azdır. Azərbaycan kimi futbol ənənələri olan ölkə üçün bu, çox azdır.