Vüqar Əsgərov: Hədəfimiz mövsümü ilk üçlükdə bitirməkdir

Latviyanın "Olayne" klubunun azərbaycanlı hücumçusu Vüqar Əsgərov bu komandadakı çıxışı ilə bağlı fikirlərini bölüşüb. Azerisport.az saytına açıqlamasında o, öncə bunları söyləyib:

"Mövsümün əvvəlində klub rəhbərliyi ilə görüşdük. Qarşımıza mövsümü ilk üç pillədən birində başa vurmaq hədəfi qoyulub. Gənc komandayıq. Həm rəhbərlik, həm də baş məşqçi daha çox gənclərə üstünlük verir. Komandada gənc olmayan cəmi beş futbolçu var.  Qalan hamısının 17-20 yaşı var. Biz təcrübəlilər də bu gənclərə kömək etməyə çalışırıq".

O, cari mövsümdək məhsuldar çıxışından da söz açıb: "Geridə qalan oyunların hamısında iştirak etmişəm. Artıq 14 qol vurmuşam. Bu tempdə davam edəcəyimə ümidliyəm. Hücumçunun işi elədir ki, necə oynayırsan oyna, amma penalti qazan, qol ötürməsi et və ya özün fərqlən. Özü də vurduğun qol və qollar qələbə üçün yetərli olmalıdır. Mən də hər oyuna bu fikirlərlə çıxıram və bu, məni motivasiya edir".

Əsgər Azərbaycana mümkün dönüşü barədə də söz açıb: "Azərbaycandan heç bir təklif almamışam. Təklif gözləyib-gözləmədiyimi deyə bilmərəm. Bu barədə düşünmürəm də. Həmişə demişəm, yenə də deyirəm, Azərbaycan mənim vətənimdir. Həmişə bu ölkədə, bu ölkənin hansısa komandasında oynamağa şad olaram".

31 yaşlı forvard Latviyanın digər klublarına keçmək variantına da toxunub: "Hələ burada transfer pəncərəsi açılmayıb. Həmin vaxt yaxınlaşdıqca hansısa klubun mənimlə maraqlanıb-maraqlanmadığını biləcəyəm".