Yay Futbol Düşərgəsi layihəsində 1-ci mərhələ başa çatdı
"Kapital Bank" ASC, "Paşa Həyat Sığorta" ASC-nin sponsorluğu, Təhsil Nazirliyi, Sumqayıt Şəhər İcra Hakimiyyəti, Sumqayıt Şəhər Təhsil Şöbəsi və "Azərikimya" İstehsalat Birliyinin dəstəyi, "Sumqayıt" Futbol Klubunun təşkilatçılığı ilə Sumqayıt məktəbliləri üçün keçirilən "Yay Futbol Düşərgəsi" layihəsinin birinci mərhələsi başa çatıb. Qrupun son gününüdə bütün iştirakçılar mükafatlandırılıb. "Kapital Bank Arena"nın konfrans zalında baş tutan mərasimdə "Sumqayıt" FK-nın Müşahidə Şurasının sədri Abdulla Məmmədov, futbol veteranları Telman Salahov, Ağamusa Bağırov, Sabir Əliyev, klubun texniki direktoru Aqil Məmmədov, məşqçi heyəti Seymur Rəhimov, Etibar Tarıverdiyev, Azad Mütəllimov, Elşad Eyvazov və başqaları iştirak edib. Layihənin yekunu ilə əlaqədar olaraq, bütün iştirakçılara "Sumqayıt" FK-nın idman geyimləri, "Kapital Bank" ASC və "Paşa Həyat Sığorta" ASC-nin ayırdığı xüsusi hədiyyələr təqdim edilib. Xatırladaq ki, "Yay Futbol Düşərgəsi" layihəsinin birinci mərhələsində 4, 11, 12, 16, 19, 28, 33 və 42 saylı orta məktəblərin şagirdləri iştirak edib.
Qeyd edək ki, 16 iyun tarixində start verilən layihə 9 gün müddətində 3 qrup üzrə keçiriləcək. Ümumilikdə, bu layihədə Sumqayıtda yerləşən 52 məktəb və liseyin tədris ilində fərqlənən 100-dən artıq oğlan və qız şagirdi iştirak edəcək.
