Şahruddin Məhəmmədəliyev: Onun komandadan gedişini özüm üçün uğur saymıram
"Qarabağ"ın qapıçısı Şahruddin Məhəmmədəliyevin azerisport.az saytına müsahibəsi
- Necə istirahət etdiniz?
- Avstriyaya dünən gəlmişik. Məşqlərə yeni başlamışıq. Mənim istirahətim bir qədər tez başlamışdı. Amma son on gündə xeyli məşq etmişəm ki, formada olum.
- Komandanızın qarşısında bu mövsüm ÇL-in qrup mərhələsinə vəsiqə qazanmaq hədəfi qoyulub...
- Biz bunu çox istəyirik. Amma hər şey Tanrının əlindədir. Biz sadəcə, bu hədəfimizə çatmaq üçün çalışacağıq.
- Yəqin ki, bunun üçün münasib rəqiblərin düşməsini arzulayırsınız...
- Əsas odur ki, biz yaxşı formada olaq. Rəqiblərimizin kim olmasının isə o qədər də fərqi yoxdur.
- Fərhad Vəliyevin komandanı tərk etməsi sizin heyətə düşmək şanslarınızı artıraracaq?
- Fərhad mənə qardaş kimidir. Onun "Qarabağ"dan getməsini özüm üçün uğur saymıram. O, həmişə mənə dəstək göstərib, məsləhətlər verib. Bu, gənc futbolçu üçün çox önəmlidir.
- "Qarabağ"a gələndən bəri çox az oyun keçirmisiniz. Demək olar ki, hələ özünüzü sübut etməmisiniz?
- Nə qədər oynayacağıma baş məşqçi Qurban Qurbanov qərar verir. Mən şansımı gözləyirəm.
- Onunla bu barədə söhbətiniz olub?
- Qurbanov gənc futbolçuları daim dəstəkləyir, motivasiya verir. Təbii ki, mən də istisna deyiləm.
- Mövsümün sonunda niyə görünmürdünüz?
- Əməliyyat olunmuşdum. Amma bu, zədə ilə bağlı deyildi. Artıq hər şey qaydasındadır və komandamın məşqlərində iştirak edirəm.
- Komanda yoldaşınız Ansi Aqolli AÇ-2016-da çıxış edir. Təsadüfən ona görə Albaniya yığmasına azarkeşlik etmirsiniz?
- Onun komandasının oyunlarına baxıram. Aqolli təkcə Albaniyanın yox, həm də "Qarabağ"ı təmsil edir və bunu görmək çox xoşdur. O, yığma komandasının da ən yaxşı futbolçusudur. İstirahətə yollanmazdan öncə Ansini qucaqladım, ona uğurlar arzuladım. Ümid edirəm ki, son turda Rumıniyaya qalib gələcəklər.
- Premyer Liqanın yeni mövsümü 8 klubla keçiriləcək...
- Bu, çox pisdir. Amma çempionatın necə alınacağını zaman göstərəcək.
- Namiq Yusifovun karyerasını başa vurmasını necə qarşıladınız?
- Hər bir futbolçu karyerası ilə bağlı qərarı özü verir. Namiqə yeni işində uğurlar arzulayram. Mən isə 35-36 yaşıma kimi oynamaq istəyirəm.
