Deyan Kelhar: Vobay Neftçidə daha güclü idi, nəinki indi
"Qəbələ"nin sabiq müdafiəçisi Deyan Kelharın azerisport.az saytına müsahibəsi
- "Qəbələ"dən sonra siz Serbiya "Srvena Zvezda"sında, Sloveniya "Olimpiya"sında oynadınız və çempion oldunuz...
- "Qəbələ"də yaxşı mövsüm keçirdim. Bu komandanı unutmuram. Əlbəttə, çempion olmağı hər futbolçu istəyir. Serbiya və Sloveniyada da futbol yüksək səviyyədədir. "Srvena Zvezda" bütün dünyada tanınır. Buna görə oradakı çempionluq qiymətli idi. Sloveniyadakı çempionluğu da qeyd edərdim. Çünki "Olimpiya" bu titula 21 il sonra yiyələnə bildi. Əla mövsüm alındı.
- Azəraycandakı karyeranızla bağlı nə yadda qalıb?
- Qəbələ kimi gözəl yeri, orada təbiəti, komandanı unutmaq mümkünsüzdür. Azərbaycanda olarkən harada olduğumu dərk etmirdim. Amma kənardan baxanda başa düşünürəm ki, çox gözəl ölkədir, orada necə gözəl insanlar yaşayır.
- Keçmiş komandanızın çıxışını izləyirsiniz?
- Əlbəttə. "Qəbələ"nin Avropa Liqasının qrup mərhələsinə çıxmasına necə sevindiyimi dostlarım yaxşı bilir. Bütövlükdə, Azərbaycan futbolu ilə də maraqlanıram.
- "Olimpiya"da Azərbaycanda oynamış daha bir futbolçu - Julius Vobay da çıxış edir...
- Bəli, o da bizim klubdadır. O da "Olimpiya"nın uğurlarında az pay sahibi olmadı. Baxmayaraq ki, çox oyun keçirmədi. Vobayı "Neftçi"də çıxış etdiyi dövrdən tanıyıram. Ona qarşı oynamışdım da. Vobay "Neftçi"də "Olimpiya"dakı ilə müqayisədə daha güclü idi. Burada elə də çox oyun təcrübəsi qazana bilmir. Əvvəlki səviyyəsinə qayıtması üçün zamana ehtiyacı var. Amma əla oğlandır və hamı ilə yaxşı münasibəti var.
- "Olimpiya"nın ÇL-in təsnifat mərhələsində "Qarabağ"a rəqib olmasını istərdiniz?
- Bəli, əlbəttə, istərdim. Azərbaycanda olmuşam. İstərdim ki, komanda yoldşlarım da ölkənizi görsünlər. Onlar Bakının gözəlliyindən şoka düşərlər. "Qarabağ"la oyun barədə isə püşk bizi rəqib edəcəyi halda danışmaq olar.
- Deyəsən, ardıcıl iki mövsüm Avroliqanın qrup mərhələsində çıxış edən "Qarabağ"dan çəkinirsiniz...
- (gülür) Mən belə deməzdim. Sadəcə, hələ rəqib deyilik.
- Təsadüfən yenidən "Qəbələ"yə qayıtmaq fikriniz yoxdur?
- Bu barədə həm söhbət yoxdur, həm də təklif. Amma yenidən Azərbaycanda çıxış etmək xoş olardı. Əldə etdiyim təcrübəmlə hələ ən azı daha dörd il futbol oynaya bilərəm. Qarşıda ÇL-in oyunları var. Sonra necə olacaq, zaman göstərəcək. Ola bilsin Azərbaycana da gəldim (gülür).
