Elbrus Məmmədov: Ümid edirəm ki, XL yaşayacaq
"Xəzər Lənkəran"ın sabiq baş məşqçisi Elbrus Məmmədovun azerisport.az saytına müsahibəsi
- "Xəzər Lənkəran"ın çıxışını dayandıracağını gözləyirdiniz?
- Xeyr, gözləmirdim. İnanırdım ki, klub fəaliyyətini davam etdirəcək. Hətta buna rəğmən, XL yenə bir klub kimi yaşamalıdır.
- Azərbaycanın cənubu bu itkiyə necə dözəcək?
- Bu kluba təkcə cənubda, Azərbaycanda yox, bütövlükdə Avropada xeyli azarkeşlik edən var. Belə bir vəziyyətin yaranmasına inanmaq çətindir. Ümid edirəm ki, klub yaşayacaq. Mübariz Mənsimovun dəstəyi lazımdır.
- Geridə qalan illərdə o, futbola böyük pullar yatırdı. Bundan hansısa xeyir gördümü?
- Mübariz Mənsimov bu regionda anadan olub. O, "Xəzər Lənkəran"a maliyyə yatırmaqla gəlir götürməyi düşünməyib.
- Futbolçular, məşqçilər, veteranlar Mənsimova müraciət etməyi düşünmür?
- Siz elə bilirsiniz ki, Mənsimovun bu söhbətlərdən xəbəri yoxdur? O, hər şeyi bilir. Sadəcə, bir qədər gözləmək lazımdır. Klub yaşayacaq.
- Maraqlıdır, siz niyə mövsümün başa çatmasını gözləmədən komandanı tərk etdiniz?
- Məşqçi dəyişikliyi olanda futbolçularda bir qədər oyanma olur. Mən də ona görə getdim ki, komandada yeni nəfəs yaransın. Komanda son turda "Rəvan"la oynayanda mən Kiyevdə məşqçi kursunda idim. Həmin oyunda dua edirdim, 2:0 öndə olduqlarını öyrənəndə sevindim.
- XL həmin oyunda qələbə qazansaydı, elitada qala bilərdi. Sizcə, komanda növbəti mövsümdə də bu vəziyyətdə çıxış edə bilərdi?
- Çətin idi. Çünki FİFA-nın sanksiyası klub üçün xeyli çətinliklər yaratmışdı.
- Bəs bu klubun futbolçuları, məşqçiləri nə olacaq?
- Mən bu komandada oynamış futbolçularla yaxından maraqlanıram. Onların gələcək karyerası üçün əlimdən gələni edirəm. Tez-tez zəng edirlər, məsləhət alırlar. Bacardığım qədər kömək edəcəyəm.
- Yeni mövsümdə elitada cəmi 8 klub mübarizə aparacaq...
- Bu, çox pisdir. AFFA bəzi klublara güzəştə gedə bilərdi. Regionlarda futbolun vəziyyəti getdikcə daha da pisləşir. "MKT-Araz", "Şəmkir", "Karvan", "Turan", "Xəzər Lənkəran" kimi nəhəngləri itirmişik. Futbolu inkişaf etdirmək istəyiriksə, regionlara diqqət atrmalıdır.
