Rail Məlikov: AZAL-da maliyyə vəziyyəti düzəlməsə, ayrıla bilərəm
AZAL-ın kapitanı Rail Məlikovun azerisport.az saytına müsahibəsi
- Yenidən Türkiyəyə yollanmağa hazırlaşmırsınız?
- Gedəcəyəm deyə bilmərəm. Amma vəziyyət tələb etsə, gedə bilərəm. Çünki bu ölkənin birinci liqa klublarından təkliflər var.
- AZAL az pul verdiyinə görə getmək istəyirsiniz?
- Klubda maliyyə vəziyyəti düzəlməsə, getmək məcburiyyətində qalacağam. Amma qalmaq istərdim.
- Vitse-prezidentiniz Fikrət Hüseynov dünən deyib ki, klubun büdcəsi artırıla bilər?
- Ümid edirəm ki, elə də olacaq. Büdcəni artırmaq, komandanı gücləndirmək lazımdır. Əks halda uzağa getmək çətin olacaq. Klubla müqaviləm başa çatıb. Amma vəziyyət düzəlsə, yenidən danışa, müqavilə bağlaya bilərik.
- Premyer Liqada cəmi 8 klubun mübarizə aparacağı bildirilir...
- Kobud ifadələr səsləndirmək istəməzdim. Amma bu, gülməlidir. Azərbaycan futbolu tarixində hələ belə şey olmamışdı. "Rəvan"la "Xəzər Lənkəran" bacarmırsa, birinci divizion klubların dəvə etsinlər. Regionlarda yaxşı komandalar var.
- Bəlkə hansısa komandanın mövsümün ortasında çempionatı tərk etməməsi üçün belə edirlər?
- İstək olandan sonra, belə problemlərin yaranmaması üçün hər şeyi etmək olar. "Turan Tovuz" və "Zaqatala"ın elitaya buraxmaq olar. "Neftçala" son iki mövsümdə birinci divizionun qalibi olub. Amma 8 klubla çempionat keçirmək gülməlidir. Ümid edirəm ki, futbol başbilənlərimiz düzgün qərar qəbul edəcəklər.
- Sizə elə gəlmir ki, çempionat 8 klubla keçirilsə, AZAL bu heyətlə autsayder olacaq?
- Klubun yaxşı büdcəsi olsa, komanda autsayder olmaya bilər. Tərlan Əhmədovun bu klub üçün inkişaf proqramı var. Məncə, komanda növbəti mövsüm uğurlu çıxış edə biləcək.
