Roman Qriqorçuk: Mənim üçün ideal turnir 16 komandalı çempionatdır
"Qəbələ"nin baş məşqçisi Roman Qriqorçukun azerisport.az saytına müsahibəsi
- Qışda "Qəbələ"ni köməkçilərinizdən Andrey Qluşenko tərk etmişdi, indi də Mixail Savka ilə Stepan Matveyev. Yəni Qəbələ bu qədər pisdir?
- Buna anlayışla yanaşıram. Onların ailələri yanında olmadan burada yaşamağın necə çətin olduğunu görürdüm. Fikrimcə, özləri üçün düzgün qərar qəbul etdilər.
- Onların yerinə Ramin Quliyevi gətirəcəksiniz?
- Bəli. Bizdə həm də Sənan Qurbanov var. Köməkçisiz qalmayacağam. Bu gündən artıq yeni mövsümün hazırlığına başlayırıq.
- Vitse-prezident Fariz Nəcəfov üç legionerlə danışıq apardığınızı deyib...
- Bircə onu bilirəm ki, bu yöndə iş aparılır. Amma sizə konkret heç nə deyə bilmərəm. Amma güclənəcəyimiz dəqiqdir.
- "Qəbələ" daha güclü olacaq?
- Buna ümid edirik. Elə etmək istəyirik ki, hər gün daha güclü komandaya çevrilək.
- Meydanda böyük iş görən Aleksey Qaysız sizə çətin olmayacaq?
- (gülür) Onun haqda çox danışmışam. Ciddi fiqurdur. Ona gördüyü işə və peşəkarlığına görə təşəkkürümü bildirirəm. Amma bundan sonra onsuz irəliləməliyik. Önümüzə baxmalıyıq.
- Büdcənin azalması sizə çətinlik yaratmayacaq?
- Bu, mənim işim deyil. Bununla rəhbərlik məşğul olur. Şəxsən mən heç nədən qorxmuram. Mənim üçün pul ikinci dərəcəli məsələdir. Əsas futbolun özüdür.
- Vəziyyət o dərəcədə pisdir ki, Tiflisdə təlim-məşq toplanışında olacaqsınız?
- Ukrayna "Çernomorets"i ilə Avropa Liqasında tarix yazanda biz bütün hazırlığımızı Odessada həyata keçirmişdik.
- Avropa Liqasındakı potensial rəqiblərinizin siyahısına baxmısınız?
- Baxmışam. Variantlar həddən artıq çoxdur. Ona görə də buna çox enerji sərf etməyə dəyməz. Püşkatmaya sakit baxıram. Rəqibimizi tanıyandan sonra həmin oyunlara hazırlaşacağıq.
- Növbəti mövsüm Premyer Liqa 8 klubla keçirilə bilər. Bu, sizi narahat etmir?
- Mənim üçün ideal turnir 16 komandadan ibarət çempionatdır. Amma mən Azərbaycan Premyer Liqasının belə keçirilməsini tələb edə bilmərəm. 8 komandalı turnir də maraqlı ola bilər. Maraqlı mövsüm izləmək olar.
- Avropa çempionatını izləyəcəksiniz?
- Bütün oyunları diqqətlə izləyəcəyimi deməzdim. Amma bəzi oyunlara baxmağı planlaşdırıram. Ola bilər ki, özüm üçün yeni nəsə kəşf etdim. Məhz bu üzdən AÇ maraqlıdır. Lakin qarşıda "Qəbələ"nin təlim-məşq toplanışı var və bu, mənim üçün daha vacibdir.
