Fariz Nəcəfov: Artıq əvvəlki imkan yoxdur, büdcə azaldılıb
Azerisport.az sizi "Qəbələ"nin vitse-prezidenti Fariz Nəcəfovun müsahibəsi ilə tanış edir.
- Sergey Zenyovla Aleksey Antonovun da "Qəbələ"ni tərk etdiyi barədə xəbərlər doğrudur?
- Onların hər ikisi ilə daha bir illik müqaviləmiz var. Özlərinə klub tapsalar, ayrılmağımız mümkündür. Amma hansısa biri qala da bilər. Böyük ehtimalla başqa gedən olmayacaq.
- Bəs Roman Qriqorçukun köməkçiləri - Mixail Savka ilə Stepan Matveyevin gedişinə münasibətiniz necədir?
- Onlar bizə öncədən də demişdilər ki, ailə vəziyyətləri ilə əlaqədar burada qala bilmirlər. Yeni məşqçi axtarmalı olacağıq?
- Məsələn?
- Qapıçılar üzrə məşqçi. Ramin Quliyev də Qriqorçukun köməkçisi ola bilər.
- Komandaya yeni oyunçular cəlb olunacaq?
- Xorvatiyadan olan oyunçu ilə danışıq aparırıq. Kiprdə oynayan Afrika təmsilçisi də var. Həmçinin, hücum xəttinə bir legioner almaq istəyirik. Danışıqlar gedir. Yaxın günlərdə bu məsələlər həll olunmalıdır.
- Avroliqada hədəfiniz nədən ibarət olacaq?
- Ötən il bizdən qrup mərhələsinə düşməyi çox az adam gözləyirdi. Amma biz uğur qazana bildik. İndi də həmin uğuru təkrarlamaq istəyirik. Hazırda komandaya əvəzedici heyətdən 8 futbolçu cəlb olunub. Baş məşqçinin də qarşısına məqsəd qoyulub ki, onların ikisi əsas komandada oynamalıdır. Artıq çoxlu legioner dəvət etməyə imkan yoxdur. Büdcə azaldılıb.
- Gürcüstana toplanışa getmək də büdcənin azaldılması ilə əlaqədardır?
- Bütün məqamları nəzərə almağa çalışmışıq. Viza ilə bağlı mümkün problemləri də.
- Premyer Liqanın yeni mövsümü 8 klubla keçirilə bilər...
- Mən Premyer Liqada 10-12 klub görmək istəyirəm. Amma qərarı başqaları verir. Lakin bir məsələ də var ki, pis stadionlarda oynamaqdansa, elə 8 klubdan ibarət çempionat keçirmək yaxşıdır.
