"Azərbaycan Avropada 8 klub ilə çempionat keçirən 4-cü ölkə ola bilər ki, bu da çox pis haldır"

AZAL-ın vitse-prezidenti Fikrət Hüseynov növbəti mövsümdə Premyer Liqada 8 klubun mübarizə aparacağına dair ehtimallara münasibətini açıqlayıb. Azerisport.az xəbər verir ki, o, bunları söyləyib:

"Bu gün Klublar Komitəsinin iclasında daha çox legionerlərə görə ödənilən üzvlük haqqını müzakirə etdik. Ramin Musayevi də iclasa dəvət etdik. Ümid edirik ki, AFFA İcraiyyə Komitəsinin iyunun 13-də baş tutacaq növbəti iclasında lehimizə qərar qəbul olunacaq. Biz üzvlük haqqının tam ləğv olunmasını istəmirik, sadəcə, azaldılmasını istəyirik. Çünki klublarda hazırda maliyyə vəziyyəti hər kəsə yaxşı bəllidir. İndi bizdə elə vəziyyət yaranıb ki, Avropada 8 klubla çempionat keçirən dördüncü ölkə ola bilərik. Bu, futbolumuzun imici baxımından çox pis haldır. Ümid edirik ki, bu dəfə təklifimiz keçəcək. Yenə də hər legionerə görə 5 min manat ödəməyi təklif etdik. Bu, bütün klubların istəyidir. Hətta "Qarabağ"la "Neftçi"nin də buna ehtiyacı var. Sponsorlara çətindir. Əvvəllər heç bu məsələni qaldırmırdıq. Amma indi buna ehtiyacımız var".