Asif Məmmədov: Qriqorçuk şans verdi, mən də bundan yararlandım

"Qəbələ"nin müdafiəçisi Asif Məmmədov klubla yeni müqavilə imzalamasına münasibət bildirib. Azerisport.az saytına açıqlamasında o, bunları söyləyib:

"Qış fasiləsindən sonra Roman Qriqorçuk mənə şans verdi və mən də bundan istifadə etməyə çalışdım. Komanda yaxşı mövsüm keçirdi, Avropa Liqasının qrup mərhələsində oynadı, çempionatda üçüncü oldu. Ona görə də mövsümü uğurlu sayıram. Öz oyunum barədə nəsə deyə bilmərəm, qiyməti siz verirsiniz. Amma bilirəm ki, daha da artırmaq lazımdır. Mövsüm bitəndən sonra müqavilə təklif etdilər, mən də qalmağa razılaşdım. Komandanı xeyli oyunçu tərk edib. Amma bu, Roman Qriqorçukun qərarıdır. Mövsümün əvvəlində rəqiblərimiz zəif olsa, bizim üçün də asan olar. Çünki heyətdə yeni futbolçular olacaq".