Tato: Zirə İspaniya La Liqasında oynaya bilməz
"Zirə"nin ispaniyalı yarımmüdafiəçisi Tato azerisport.az saytına müsahibəsində paytaxt klubundan gedişi barədə danışıb:
- Hazırda nə işlə məşğulsunuz?
- Ailəmlə, dostlarımla birgə İspaniyada istirahət edirəm.
- Azərbaycandakı ilk iliniz barədə nə deyə bilərsiniz?
- Ölkəniz çox gözəldir. "Zirə" də yaxşı kludur. Orada yaxşı insanlar çalışır. Amma qazon mənim üçün əsl problem idi. Ona görə də komandadan ayrılmağa qərar verdim. Çempionatınız isə normal idi.
- Hansı oyunlar sizin daha çox yadınızda qaldı?
- "Zirə" yaxşı mövsüm keçirdi. Əksər oyunlarımız uğurlu oldu. Bunun da nəticəsində ikinci yeri tutduq. Amma uğursuz oyunlar kimi "Rəvan" və AZAL-a minimal hesabla uduzduğumu matçları qeyd edərdim.
- İspaniyada "Zirə"ni tanıyırlar?
- Məni tanıyan hər kəsin bu klub barədə məlumatı var. Amma "Zirə" İspaniya La Liqasında oynaya bilməz. Çünki İspaniya çempionatı dünyanın ən güclü liqalarından sayılır.
- Klub sizi saxlamaq üçün heç bir təklif irəli sürmədi?
- "Zirə"də hər kəslə münasibətim əla idi. Sadəcə, orada qala bilməzdim. Komanda süni örtüklü meydanda oynayır. Bu isə mənim ayaqlarıma ziyandır. Üstəlik, məşqlərimizi də orada keçirirdik.
- Deməli, qazon sizin ayrılmağınızın əsas səbəbidir?
- Bəli. Belə qazonda məşq etmək, oynamaq çox ağırdır.
- Azərbaycanda təbii ot örtüyündə məşq edən, oynayan hansısa kluba transferiniz mümkündür?
- Hələ hansısa klubun məni istəyib-istəmədiyini bilmirəm. Artıq iki aya yaxındır menecerimlə bu mövzuda söhbətim olmayıb. Düzünü deyim ki, indi futbol barədə düşünməməyə çalışıram. İstirahət etmək istəyirəm. Bir həftəyə menecerim mənə zəng edəcək və gələcək taleyimi müzakirə edəcəyik.
- "Neftçi" və "Qarabağ"a keçəcəyinizə dair xəbərlər nə dərəcədə doğrudur?
- Mənim bundan xəbərim yoxdur, hər şeyi menecerim bilir. Amma həm "Neftçi", həm də "Qarabağ" yaxşı klubdur.
- Premyer Liqa növbəti mövsümdən 8 klubla keçirilə bilər...
- Federasiyanız belə qərar qəbul edibsə, deməli, bu, ən yaxşı variantdır. Hər halda federasiya rəhbərliyi də çempionatın güclü olmasını istəyər.
