Rövnəq Abdullayev: Heç bir kluba güzəşt olmayacaq

AFFA prezidenti Rövnəq Abdullayev bu gün baş tutan İcraiyyə Komitəsinin iclasında müzakirə olunan məsələlərlə bağlı açıqlama verib. Azerisport.az xəbər verir ki, o, öncə bunları söyləyib:

"Klublara daha bir həftə vaxt verildi ki, onlar lisenziya ilə bağlı qalan problemlərini həll edib, yenidən müraciət etsinlər. Əks halda çempionatın 8 klubla keçirilməsinə qərar verəcəyik. Biz hər şeyin qaydalar çərçivəsində olmasını istəyirik. Yəni, elitada son iki yeri tutan klub birinci diviziona düşsün, aşağı dəstədən də ilk iki yeri tutan Premyer Liqaya yüksəlsin. Ötən mövsüm "Rəvan"a güzəştə getdik. Amma bu komanda xal yığmaq əvəzində, FİFA tərəfindən cəzalandırıldı. Bu mövsüm güzəşt olmayacaq. UEFA hazırda federasiyalarda monitorinqlər aparır. Təbii ki, Azərbaycan futbolunu da diqqətlə izləyirlər. Hər şey qaydalar çərçivəsində olmalıdır. Buna görə də heç bir güzəştdən söhbət gedə bilməz".

Onun sözlərinə görə, çempionat 8 klubla keçirilsə, format dəyişməz olaraq qalacaq: "8 klub da olsa, dörd dövrəli çempionat keçirəcəyik. Əlbəttə, çempionatın səviyyəsi enəcək. Biz də bunu başa düşürük. Amma başqa çıxış yolu yoxdur. Bir həftə sonra yenidən toplanacağıq. Klublara kömək etmək istəyirik".

Abdullayev "Xəzər Lənkəran" və "Bakı" kimi klublara kömək etməyin mümkünlüyünə də toxunub: "Bu, artıq real deyil. "Xəzər Lənkəran"la "Bakı"nın ciddi problemləri var. Təsadüfi deyil ki, FİFA "Bakı"nın hesabından 15 xal sildi. Hər iki klubun böyük maliyyə problemləri var. Ona görə elitada çıxış edəcəklərinə inanmıam. Biz bu klublara stadionlarını saxlamaq üçün müraciət etmək istəyirik. Amma onlara maliyyə köməyi göstərmək ağırdır. Çünki çox ciddi məbləğdə borcları var".