Vəli Qasımov: Minimum hədəf bürünc medal qazanmaq olacaq
"Neftçi"nin baş məşqçisi Vəli Qasımovun azerisport.az saytına müsahibəsi
- Müşahidə Şurası sizi baş məşqçi postunda saxlamağa qərar verdi. Siz yeganə namizəd idiniz?
- Bu suala cavab verə bilmərəm. Çünki məni Müşahidə Şurasına artıq haqqımda qərar verdikdən sonra dəvət etdilər.
- Müqavilənin müddəti nə vaxta qədərdir?
- Biz hələ müqavilə imzalamamışıq. Amma ən azı bir il buradayam.
- İdman direktoru postunda da qalırsınız?
- Müvəqqəti. Hələ həmin posta yeni adam tapa bilməyiblər. İki vəzifədə çalışmaq çətindir. Kim gələ bilər? Bu sual artıq mənimlə müzakirə olunmamalıdır.
- İstirahətiniz hələ davam edir?
- İstirahət hələ başlamayıb (gülür). Böyük ehtimalla daha istirahət etməyəcəyəm. Buna vaxt yoxdur. Həlli vacib çoxlu məsələ var.
- "Neftçi" bu transfer pəncərəsində çox sakit görünür. Kimlərin gedəcəyinə, kimləri alacağınıza qərar verməmisiniz?
- Təxmini olaraq kimlərin gedəcəyini bilirəm, amma yekun qərar verməmişəm. Çünki hər şey yeni transferlərdən asılı olacaq.
- Müşahidə Şurası büdcəni də müzakirə edib. Artım var?
- Büdcə ilə bağlı detalları açıqlaya bilmərəm. Amma heyəti gücləndirmək lazımdır. Yaxşı oyunçular almalıyıq. Gənclərin çoxluğu yaxşıdır. Amma təcrübəli futbolçular olmasa, nəticə qazanmaq çətin olacaq. Legioner futbolçularla güclənəcəyik.
- Son dövrlər Vaqif Cavadovla Kamran Ağayevin "Neftçi"yə keçəcəyi barədə xəbərlər dolaşır. Onlarla maraqlanırsınız?
- Biz artıq bu məsələdə gecikirik. Bu həftə yeni transferlərlə bağlı məsələyə aydınlıq gətirməliyik. Amma qeyd etdiyiniz futbolçularla bağlı sizə dəqiq heç nə söyləyə bilmərəm.
- Qarşınıza hansı hədəflər qoyuldu?
- Premyer Liqada mükafatlar uğrunda mübarizə aparacağıq. Minimum hədəf bürünc medal qazanmaqdır. Avropa Liqasına gəlincə, heyəti gücləndirə bilsək, ən azı iki mərhələ keçmək istəyirik. Gənc futbolçularla çox uzağa gedə bilmərik.
