Kamran Quliyev: Müsahibələr onu korlaya bilər
"Sumqayıt"ın prezidenti Kamran Quliyevin azerisport.az saytına müsahibəsi
- Bir ay öncəsi müsahibənizdə "Sumqayıt"ı heç kimin tərk etməyəcəyini demişdiniz. Amma çempionat bitən kimi Səlahət Ağayev, Slavik Alxasov, Ağabala Ramazanov və Pərdis Fərcad-Azad "İnter"ə üz tutdu...
- Mən belə söz deyə bilmərəm. "Sumqayıt"ı tək bu dörd futbolçu yox, digərləri də tərk edib. Hansı futbolçular baş məşqçinin planlarına daxil deyildi, onlarla yollar ayrılıb. Səlahət, Slavik, Ağabala və Pərdis yaxşı təklif aldığı üçün getdilər. Başqa səbəb yoxdur. Samir Zərgərovla Tərlan Quliyev niyə "İnter"ə keçdi? Təbii ki, yaxşı pul alacağı üçün. Bu, futbolda normal haldır.
- Komandanızın növbəti mövsüm üçün hədəfi nədən ibarət olacaq?
- Bu sualınıza avqustun 1-də dəqiq cavab verə biləcəyəm. Çünki hələ transferlərlə bağlı yekun qərar bəlli deyil. Legioner almaq məsələsi də açıq qalır. Qərarı klubun Müşahidə Şurası verəcək. Amma hazırda yerli futbolçulardan bəzisi ilə danışıq aparırıq. Hələlik, ad açıqlamaq istəmirəm.
- Niyə?
- Çünki biz hansı futbolçu ilə maraqlanmağa başlayırıqsa, onunla digər komandalar da danışıqlara başlayırlar.
- Amil Yunanovun yığmadakı oyunlarını izlədiniz?
- Amil yığmada debüt etdi, Andorraya qarşı oynadı. Hər şey birdən-bir olmur. Yunanov da öz üzərində daha çox çalışmalıdır. Amilə inanırıq. O, hələ öz sözünü deyəcək.
- Bir dəfə saytımıza müsahibənizdə demişdiniz ki, Amili elə qiymətə satacaqsınız ki, həmin pulla Azərbaycana ikinci Reynaldonu gətirmək mümkün olacaq. Maraqlıdır, həmin açıqlamadan sonra Amilə "elçi düşən" olub?
- Biz ondan sonra Amillə müqavilə imzaladıq və qiymətini də qaldırdıq (gülür). Reynaldo "Qarabağ"a, Amil isə bizə lazımdır. O, gəncdir, üzərində daha çox çalışmalıdır. Son dövrlər mətbuatın onunla çox maraqlandığını görürəm. Amma xahiş edirəm ki, ondan çox müsahibə almayıb. Qoy daha çox məşq etsin, oyunu barədə düşünsün. Müsahibələr onu korlaya bilər. Bunu dəfələrlə görmüşük.
- Ev oyunlarınızı keçirdiyiniz stadionun azarkeş tutumunu artırmağı düşünmürsünüz?
- İndi bu məsələ gündəmdə deyil. Həm də stadionun sahibi biz deyilik.
- Bəs qazonla bağlı hansı planlar var?
- Qazonu yoxladıq, hər şey qaydasındadır. Hansısa dəyişiklik nəzərdə tutulmayıb.
