Murad Səttarlı: Bunun müzakirəyə ehtiyacı yoxdur
Azərbaycan yığmasının yarımmüdafiəçisi Murad Səttarlının azerisport.az saytına müsahibəsi
- Yığmamızın Avstriyadakı 10 günlük toplanışını necə qiymətləndirə bilərsiniz?
- Bütövlükdə, toplanış çox yaxşı keçdi. Baxmayaraq ki, uşaqların hamısı ağır bir mövsümdən sonra bu toplanışa yollanmışdı. Əsas odur ki, biz bu hazırlıq prosesində üç yoxlama oyunu keçirdik. Düzdür, təəssüf ki, onların heç birində qələbə qazana bilmədik. Andorra (0:0) və Kanada (1:1) ilə heç-heçə etdik, Makedoniyaya (1:3) uduzduq.
- Son oyun - Kanada ilə görüş barədə fikirləriniz maraqlıdır...
- Maraqlı oyun oldu. Bu görüşdə qələbə qazanmalıydıq. Bunun üçün yetərli şansımız da oldu. Amma yenə də ələ düşən qol şanslarından yaxşı yararlana bilmədik. Heç-heçənin əsas səbəbi də məhz bu oldu. Buna baxmayaraq, Kanada ilə heç-heçənin pis nəticə olmadığını düşünürəm.
- Üç yoxlama oyunu arasında müqayisə aparsaq, hansını fərqləndirərdiniz?
- Makedoniya ilə oyunu. Xüsusilə də həmin matçın ikinci hissəsini. Təəssüf ki, həmin oyunda da çoxlu qol şansını boşa verdik.
- Üç oyun cəmi iki qol, onları da penaltidən...
- Düzdür, qolları penaltidən vurduq. Amma hər halda onları qazanmağı da bacarmaq lazımdır.
- Robert Prosineçki sizə oynamaq üçün kifayət qədər şans verdi?
- Fikrimcə, o, mənə yenə də şans verəcək və özümü yaxşı tərəfdən göstərə biləcəyəm.
- Bu heyətlə, belə oyunla millimiz DÇ-2018-in seçmə mərhələsində nəyə ümid edə bilər?
- Biz seçmə mərhələyə San Marinoya qarşı oyunla start verəcəyik. Bu komandaya qalib gəlməyə borcluyuq. Bunun heç müzakirəyə də ehtiyacı yoxdur.
- Qrupdakı rəqiblərimizlə maraqlanırsınız?
- Əlbəttə, onların iştirak etdikləri oyunların nəticələri ilə maraqlanıram.
- Qrupun favoriti Almaniyadır. Daha hansı komandalarla işinizin çətin olacağını düşünürsünüz?
- Bəli, Almaniya favoritdir. Amma Çexiya da çox güclüdür. Onlara qarşı oynamaq çətin olacaq. Bir neçə gün öncə Rusiyaya qalib gəldilər.
- Qarşıdakı mövsüm üçün hansı planlarınız var?
- Hələ AZAL-da qalıb-qalmayacağıma dair yekun qərar verməmişəm. 2-3 günə hər şeyə aydınlıq gələcək. Başqa klublardan dəvət yoxdur.
