Spartakın üzvü: Qarabağ, Neftçi və İnteri ən güclü klub kimi tanıyıram

Rusiyanın U-16 yığmasının və Moskva "Spartak"ının Azərbaycan əsilli müdafiəçisi Turqay Möhbalıyevin azerisport.az saytına müsahibəsi

- Öncə özün barədə məlumat verərdin...
- Naxçıvan Muxtar Respublikasının Sirab kəndində anadan olmuşam. Valideynlərim də oralıdır.

- Futbola hansı klubda başlamısan?
- Volqoqrad "Traktor"unda. Daha sonra bu şəhərin "Zenit" komandasına keçdim. Daha sonra "Olimpiya"da oldum. İndi isə Moskva "Spartak"ındayam.

- Ailənizdə yeganə futbolla məşğul olan sənsən?
- Atam da futbolçu olub. Amma onun karyerası elə də uğurlu alınmayıb. Ona görə də həm atam, həm də ailəm üçün oynayıram.

- Rusiyanın yığma komandalarına çoxdan dəvət alırsan?
- Artıq bir neçə ildir.

- Məşqçilərinin sənin barəndə fikirləri necədir?
- Məşqçilər həmişə mənə meydanda daha sakit olmağı tapşırırlar. Deyirlər ki, üzərində daha da çox çalışsan, hər şey yaxşı olacaq. Üstünlüklərim barəsində özümün nəsə deməyim düz olmaz. Bunu məşqçilər desə, daha yaxşıdır.

- Kumirin var?
- Serxio Ramos. O, mənim sevimli futbolçumdur.

- Azərbaycan futbolu barəsində nə bilirsən?
- Tez-tez maraqlanıram. "Qarabağ"ı, "Neftçi"ni, "İnter"i Azərbaycanın ən güclü klubları kimi tanıyıram. Vaqif Cavadovu da yaxşı tanıyıram. O, Hollandiya "Tvente"sində də oynayıb.

- Gələcəkdə Rusiyanı yox, Azərbaycan yığmasını seçmə barəsində düşünmürsən?
- Əlbəttə, Azərbaycan yığmasına böyük hörmətim var. Amma etiraf edim ki, daha çox Rusiya yığmasında oynamağa üstünlük verirəm. Həm də indidən tələsməyək. Yaşayıb, nəyin necə olacağını görərik.

- Vaxtilə Aleksandr Səmədov, Emin Mahmudov, Ramil Şeydayev də Azərbaycan yığmasında oynamaqdan imtina ediblər. Sən də onların davamçısı olmaq istəyirsən?
- Hər şeyin öz vaxtı var. Allah eləsin ki, öncə "Spartak"ın əsas heyətinə düşüm. Ondan sonra isə yığma komanda barədə düşünmək olar.