Adrian Skarlatake: İnter bu heyətlə çempionluğa oynaya bilər
"İnter"in yeni transferi, "Xəzər Lənkəran"ın sabiq rumıniyalı müdafiəçisi Adrian Skarlatakenin azerisport.az saytına müsahibəsi
- Azərbaycanı tərk edəndən sonra futbolumuzu izləyirdiniz? Belədirsə, yəqin ki, "İnter"in heç də yaxşı günlərini yaşamadığını bilməlisiniz...
- Azərbaycanda dörd il futbol oynamışam. Şübhəsiz ki, gedəndən sonra da futbolunuzu izləyirdim. Hər şeyə rəğmən, yenidən Azərbaycana qayıtdığım üçün şadam.
- "İnter"ə keçidiniz barədə nə deyə bilərsiniz?
- Bu klubdan təklif aldım. İmtina etmək istəmədim və bir illik müqavilə imzaladım. "İnter" kimi ciddi bir kluba keçmək xoşdur. Ümid edirəm ki, bu əməkdaşlıqdan hər iki tərəf ancaq xeyir görəcək. Eyni zamanda komandanın növbəti mövsümdə uğurlu çıxış edəcəyinə də ümidim çoxdur.
- "İnter" üçün uğurlu nəticə nəyi hesab edirsiniz?
- Çempionatın qalibi olmağı. "İnter" bu yay yaxşı transferlər edib. Fikrimcə, bu heyətlə qızıl medallar uğrunda mübarizə apara biləcəyik.
- Amma hazırda Azərbaycanda "Qarabağ"la rəqabət apara bilən klub yoxdur...
- Razıyam ki, "Qarabağ" Azərbaycanın hazırda ən yaxşı klubudur. Amma bu, digər komandaların ancaq ikincilik barədə düşünməli olduğu anlamına gəlmir. Düzdür, Ağdam klubu ilə çempionluq uğrunda mübarizə aparmaq çətin olacaq, amma mümkünsüz də deyil. Başa çatan mövsümdə Rumıniya çempionu oldum. Növbəti mövsümdə də Azərbaycan çempionu olmaq istəyirəm.
- İstisna deyil ki, növbəti mövsüm 8 klubun iştirakı ilə keçirilsin...
- Ümid edirəm ki, belə olmayacaq. Çempionatda yenə də ən azı 10 komandanın iştirak etməsini istərdim. Bu, daha maraqlı olardı.
- Keçmiş klubunuz "Xəzər Lənkəran"ın böyük futboldan çəkildiyini bilirsiniz?
- Bəli. Bunu eşitmək mənə çox ağır oldu. Bu klub ən yaxşı azarkeşlərə malik idi. Ümid edirəm ki, bu hal müvəqqətidir və qarşıdakı mövsümlərdə komanda öz çıxışını bərpa edəcək.
