Ruslan Qurbanov: Kanadanın reytinqi bizi qorxutmur
Azərbaycan yığmasının hücumçusu Ruslan Qurbanovun azerisport.az saytına müsahibəsi
- Azərbaycan yığması Avstriyadakı ikinci yoxlama oyununda Makedoniyaya 1:3 hesabıyla uduzdu. Öncə bu oyun barədə fikirlərinizi bilmək istərdik...
- Biz oyuna düzgün başlamadıq. Birinci hissəni çox zəif keçirdik. İkinci yarıda isə təşəbbüsü ələ aldıq. Lakin təəssüf ki, son dəqiqələrdə rəqib daha bir qol vuraraq, qalib gəldi.
- Rəqibin heyətində kimi qeyd edərdiniz?
- Qoran Pandev təhlükəli oynayırdı. Amma bütövlükdə, Makedoniya yığması sırf bizim səhvlərimizdən yararlanmaqla qollar vurdular.
- Qol epizodlarında sanki yığmamızın üzvləri bir-birini başa düşmürdü...
- Bəli, biz ilk iki qolu rəqibə hədiyyə etdik.
- Yorğunluğun təsiri oldu?
- Əlbəttə, yorğunuq. Bir neçə gün öncə "Qarabağ"la "Neftçi"nin futbolçuları ölkə kubokunun finalında 120 dəqiqə mübarizə apardıqdan sonra bura gəldi. Amma bütün bunlar məğlubiyyətimizə haqq qazandırmır. Bu oyunu analiz edib, buraxdığımız səhvləri növbəti oyunlarda təkrarlamamağımız lazımdır.
- Yığmamız rəsmi oyunlarda da uduzur, yoxlama görüşlərində də. Bəs nə vaxt qələbə qazanacağıq?
- Biz də qələbə qazanmağı çox istəyirik. Amma son zamanlar alınmır.
- Andorra və Makedoniyaya qalib gələ bilməyən yığmada psixoloji vəziyyət nə yerdədir?
- Analizlər aparmalı və Kanada ilə oyuna hazırlaşmalıyıq. Bu toplanışı qələbə ilə başa vurmaq istəyirik. Azarkeşlərimizi sevindirmək üçün əlimizdən gələni edəcəyik.
- Kanada üzərində qələbəyə inanırsınız?
- Rəqib ciddi komandadır. Onlara qarşı oynamaq maraqlı olacaq. Amma düzünü desəm, rəqib komandada heç kimi tanımıram. Bu, mənim üçün maraqlı da deyil. Rəqib barədə yox, öz oyunumuz haqda düşünməliyik. Azarkeşlər bizdən qələbə gözləyirlər, onları sevindirməliyik.
- Kanadanın dünya reytinqində 95-ci yeri tutmasının hansısa önəmi var?
- Xeyr. Bu, bizi qorxutmur. Sadəcə, rəqibin səviyyəsini göstərir.
