Əfran İsmayılov: Penalti zərbəsini mənim vuracağım bir gün öncədən bəlli idi
Azərbaycan yığmasının yarımmüdafiəçisi Əfran İsmayılov Avstriya toplanışı çərçivəsində Makedoniyaya qarşı yoxlama oyunundan (1:3) sonra azerisport.az saytının suallarını cavablandırıb.
- Oyun barədə nə deyə bilərsiniz?
- Çətin olacağını bilirdik. Oyuna ciddi yanaşırdı. Qələbə qazanmağı çox istəyirdik. Çünki heç vaxt Makedoniyaya qalib gələ bilməmişdik. Gördüyünüz kimi, iki fərqli hissə alındı. Birinci yarıda pis, ikincidə bir qədər yaxşı oynadıq.
- Bu, nə ilə bağlıdır?
- Bunun dəqiq səbəbini deyə bilmərəm. Amma birinci hissədə "yatdığımız" faktdır. Rəqibə iki qol vurmağa imkan verdik. İkinci yarıda isə toparlandıq. Baş məşqçi bizə vəziyyətə uyğun necə davranmağı tapşırdı. Bunun sayəsində də ikinci 45 dəqiqəni uğurlu keçirdik. Hesabı bərabərləşdirmək şanslarımız da var idi. Amma biz bunu bacarmayınca, makedoniyalılar üçüncü qolu vurdular.
- Penalti zamanı nöqtəyə Dmitri Nazarov yanaşsa da, Robert Prosineçki onu sizin vurmağınızı istədi...
- Bir gün öncə belə razılaşmışdıq ki, penalti olsa, birinci mən vuracağam. Mən meydanda olmasam, Nazarov nöqtəyə yaxınlaşmalı idi.
- Penaltini qaçıracağınıza dair qorxu və həyəcan yox idi ki?
- Həmin anda bütün fikirləri bir kənara atıb, soyuqqanlı olmaq lazımdır. Mən də belə etdim.
- Üçüncü buraxılan qol daha çox sizin səhvinizdən vuruldu...
- Deməzdim. Maksim Medvedev ötürməyə gecikdi. O, topu mənə ötürəndə bunu gözləmirdim. Amma heç kimi günahlandırmıram. Komandamız oyunun sonunda ancaq hücum etmək barədə düşünürdü.
- DÇ-2018-in seçmə mərhələsindəki rəqiblərimizdən Norveç, Şimali İrlandiya və Çexiya nümayəndələri millimizin oyununu izləyirdi. Ola bilər ki, məşqçilər korpusu onları yanıltmaq üçün hansısa fərqli taktika tətbiq etsin?
- Düşünmürəm. Biz bu görüşdə öz oyunumuzu sərgilədik. Belə matçlar seçmə mərhələ öncəsi çox önəmlidir. Artıq Kanada ilə görüşü düşünürük. Sonuncu rəqibimiz daha çətindir.
