Tahir Süleymanov: Final matçının Fariz Yusifova tapşırılması düzgün addımdır
Keçmiş FİFA referisi, "Neftçi"nin sabiq vitse-prezidenti Tahir Süleymanov bu gün keçiriləcək ölkə kubokunun final matçı öncəsi fikirlərini bölüşüb. Azerisport.az saytına açıqlamasında o, "Qarabağ" - "Neftçi" matçının Fariz Yusifova həvalə olunmasına belə münasibət bildirib:
"Son zamanlar hakimliklə bağlı qalmaqallar səngimir. Topaz Premyer Liqasının son turu çərçivəsində keçirilmiş "Rəvan" - "Xəzər Lənkəran" matçında baş verənlər isə bu narazılıqlara böyük bir nöqtə qoydu. Bizim həmişə istedadlı hakimlərimiz olub. Amma son illərdə onların yolunda əngəllər peyda olmağa başlayıb. Hazırda bu sahədə çox böyük problemlər var. Amma yetirməm olan Fariz Yusifovun işi məni sevindirir. Hakimlər Komitəsi gənc hakimləri final matçına təyin etməkdən qorxduğu üçün bu matçı Fariz Yusifova tapşırdı. Bu, düzgün yanaşmadır. Fikrimcə, bu görüşdə hakim səhvi olmayacaq. Güclü olan qalib gələcək. Fariz bu görüşün öhdəsindən problemsiz gələcək. "Qarabağ" güclüdür, amma "Neftçi" də bu komandaya ciddi müqavimət göstərə bilər. Əks halda Ağdam klubu asan qələbəyə sevinəcək".
