Qurban Qurbanov: Bizi ən ağır oyun gözləyir

"Qarabağ"ın baş məşqçisi Qurban Qurbanov sabah keçiriləcək "Neftçi" ilə ölkə kubokunun final matçı öncəsi fikirlərini bölüşüb. Azerisport.az xəbər verir ki, o, bu gün baş tutan mətbuat konfransında öncə bunları söyləyib:

"Final oyunu hər bir futbolçunun arzusudu. Əlbəttə, hər oyunçu bu finalda qələbə qazanmaq istəyir. Mövsüm bizim üçün uğurlu keçdi. Buna baxmayaraq, hər oyunçu bu matçın nə qədər əhəmiyyətli olduğunu başa düşməlidi. "Neftçi" son dövrlər yaxşı oyun sərgiləyir. Güclü komandaya qarşı oynayacağıq. Hər bir komanda istəyər ki, kuboku qazansın. Ancaq kuboku bir komanda qazanacaq. Bu, mövsümün ən ağır oyunu olacaq. Rəqibin heyətində güclü oyunçular var. Araz Abdullayev, Anyete, Ruslan Qurbanov, Elşən Abdullayev və Rəhman Hacıyev yaxşı formadadır, hər biri çox sürətli futbolçudu. Sabah müdafiədə xüsusilə diqqətli olmalıyıq. Həm "Qarabağ", həm də "Neftçi" azarkeşlərinin say çoxdu. Ümid edirəm ki, sabah əsl futbol bayramı görəcəyik".