Qara Qarayev: Qarabağın simpatiyası, hörməti məni burda qalmağa məcbur edir

“Qarabağ”ın dayaq yarımmüdafiəçisi Qara Qarayev azerisport.a saytına müsahibəsində komandasının çempionluğundan danışmaqla yanaşı, “Neftçi”yə keçəcəyi haqda söz-söhəbətlərə münasibət bildirib:

- Ardıcıl üçüncü dəfə çempion olursuz. Bu mükafat dəyərini itirmir?
- Hələ mövsüm başa çatmayıb. Hər titulun öz yeri, öz gözəlliyi var. İndiyə qədər istəyimizə çatmışıq. Kubokun finalında da qələbə qazanıb, mövsümü "qızıl dubl"la başa vurmaq istəyirik.

- Gənc yaşda 3 dəfə çempion olmağın hissi necədi?
- Gözəl duyğulardı. Artıq gələcəkdə nəvələrimə göstərə biləcəyim daha bir medal qazandım. Bunu mənə qismət etdiyinə görə Allaha şükür edirəm. Bu mükafatlar bizi çox çalışmağa məcbur edir.

- Azərbaycanda mümkün olan ən yüksək titulu qazanmısan. Artıq ölkə xaricində karyera qurmağı düşünmürsən?
- Qışda əcnəbi klublardan təklif almışdım. Təbii ki, məşqçilərimlə məsləhətləşmələr apardıq. Qaneedici şərtlər olsa, ölkə xaricinə yollanmaq olar. Amma bu gün getməklə bağlı plan yoxdu.

- "Neftçi”yə keçəcəyinlə bağlı xəbər yayılıb. Nə dərəcədə realdı?
- Mətbuatda bununla bağlı yazılanların hamısı yalandı. Heç bir yerə getmirəm. Komandamı dəyişməyə ehtiyac yoxdu. “Qarabağ”ın simpatiyası, hörməti məni burda qalmağa məcbur edir. Məcbur olmadıqca bu komandadan ayrılmayacam.

- Qış fasiləsindən sonra səninlə eyni mövqedə çıxış edən Miçel yaxşı çıxış edir. Avrokuboklarda ispan futbolçuya görə ehtiyatda qalacağını düşünmürsən?
- Bu suala baş məşqçi cavab verə bilər. Desəm ki, mən az, ya çox oynayacam, başqa mənaya yozula bilər. Baş məşqçimiz hansı qərar versə, ona hörmətlə yanaşacam. Bu bayraq altında çıxış etmək mənim üçün şərəfdi.

- Kubok oyunundan dərhal sonra millinin toplanışına qoşulacaqsan. Yorğunluq sözünü deyəcək?
- Bəzi futbolçular dincəlməyə yollanacaq, amma bizim işimiz mayın 25-dən sonra da davam edəcək. Çempionat başa çatsa da, millinin toplanışına qatılacağıq. Özümüzdə güc hiss edirik.

- Bu, avrokubok oyunları ərəfəsində yorğunluq yaratmayacaq?
- Bu, bizim işimizdi. Sona qədər oynayacağıq. Yorulsaq da, hiss etdirməməyə çalışacağıq.